Frakshon di Movementu Futuro Kòrsou (MFK), ta sumamente preokupá ku e ola di
kriminalidat ku a bin ta tuma lugá den nos sosiedat. Uso di arma di kandela ku morto
komo resultado, atrako i ladronisia di outo tin e pueblo di Kòrsou terorisá.
Banda di e puntonan ariba menshoná nos por a tuma nota ku den korto tempu tabatin
huida for di dos sel di polis. E konfiansa di pueblo den ministerio públiko ta
praktikamente nulo i pa loke ta trata kuerpo polisial nos no ta mira un maneho ku e
kuerpo ta interkambiá i komuniká mas ku pueblo.
A skohe últimamente pa laga ministerio públiko ta e identidat ku ta liberá tur
akshonnan i tambe proyektonan spesial ku ta kuerpo polisial ta ehersé, miéntras ku ta
kuerpo polisial ta esun ku ta komuniká ku pueblo i ehersé e kontrolnan.
Basa riba esaki frakshon di MFK kier hasi e siguiente preguntanan na Sr. Quincy
Girigorie enkargá ku Hustisia pa risibí informashon kon ta atendiendo pa frena e ola di
kriminalidat ku pueblo di Kòrsou ta eksperensiando;
1. Minister ta tratando e problema di kriminalidat di tal forma ku pueblo lo por
mira akshonnan konkreto ku lo tin komo konsekuensia ménos kriminalidat?
2. Durante di e último dies añanan a tene dos akshon, kaminda pueblo por a
entrega arma di kandela, minister por informá Parlamento si e kadena hudisial
a konsiderá e dos akshonnan aki komo eksitoso?
3. Si kontesta di pregunta dos ta afirmativo, minister por splika ta dikon ketu bai
tin asina tantu arma den sirkulashon?
4. Kadena hudisial tin indikashon via di kua kanal i/òf medio armanan ta
drentando Kòrsou?
5. Kua ta e akshonnan konkreto ku minister tin plania pa kontrolá i minimalisá e
kantidat di arma ku ta drenta Kòrsou i tambe kua ta e plan pa riba término
korto saka mas arma posibel for di sirkulashon?
6. Resosialisashon di prezunan ta di vital importansia pa impedí ku e prezu na
momentu ku e bandoná prizòn ta kai bek den kriminalidat, Parlamento por
risibí di minister e plan di resosialisashon ku aktualmente ta wòrdu ehekutá den
prizòn?
7. Violensia i kriminalidat ta manifestando hopi pa medio di retnan sosial, kua ta
e akshonnan konkreto ku minister ta ehekutando pa kontrolá i limitá violensia i
kriminalidat riba retnan sosial?
8. Nos ta konsiente ku pa minimalisá kriminalidat, esaki no ta un tarea di e
kadena di hustisia so, tambe mester traha riba kombatimentu di pobresa i krea
kuponan di trabou, minister por splika Parlamento den e kuadro aki, kua ta e
akshonnan konkreto pa huntu ku otro ministerionan kombatí kriminalidat?
9. Kiko konkretamente minister ta hasiendo pa loke ta trata uso di droga i tambe
importashon di droga na Kòrsou?
10. Minister tin un plan konkreto den ehekushon pa loke ta trata ladronisia di
outo, kaminda ta envolví e siudadano pa asina e por tin e seguridat ku su outo
no ta na peliger?
11. Ultimamente nos a tuma nota ku Ministerio Publiko, praktikamente a tuma
tarea di bosero di Kuerpo Polisial i tambe bosero di Ofisina di Impuesto, dor
di anunsia diferente tarea ku ta kai direktamente bou di tarea di e esnan
menshona ei. E departamentu di relashon públiko di Kuerpo Polisial i tambe e
Ofisina di Impuesto no ta funshona? Ta Minister a duna enkargo pa nan tuma
esakinan over? Of ta nan ta funshona riba nan mes?
12. Slogan di kuerpo polisial ta “Sirbi i Protehá”, un slogan ku ta mishi ku e
sentido di seguridat di pueblo di Kòrsou, Minister por splika ta dikon ora tin
kampaña manera “Trago Meisje”, “Aktua Robes, Sintié Un Bes” i “Ta Basta
Awor”, ta dikon ta Ministerio Públiko ta liberá e akshonnan aki i no kuerpo
polisial?
Pa medio di esaki, nos kier pidi presidente di Staten pa e karta aki por yega serka
Minister di Hustisia sr. Quincy Girigorie, pa mas pronto posibel nos por risibí kontesta
riba nos preguntanan.
