Entrante inmediatamente Kòrsou lo prohibí trafikashon (esta importashon, eksportashon i tránsito) di oro for di Venezuela. Esaki a ser ratifiká despues ku Promé Minister Rhuggenaath, na nòmber di Konseho di Minister, a firma 20 di yüni último un reglamento ministerial komo konsekuensha di un desishon ku Gobièrnu di Kòrsou a tuma anteriormente e aña akí.
Sakamentu di oro na Venezuela a krese na popularidat último añanan. Esaki parsialmente tin di haber ku e limitashonnan ku tin den e industria petrolero pa motibu di krísis ekonómiko di e pais i e sanshonnan internashonal imponé. Resultado di esaki ta ku ta mina kantidatnan grandi di oro venesolano i ta eksportá nan pa diferente pais na mundu, usando Kòrsou komo sentro di tránsito. Sinembargo, Kòrsou – komo pais di tránsito – no ta risibí niun entrada signifikante for di e trafikashon akí, ku ta pone ku e efektonan ekonómiko i finansiero ta hopi chikí.
For di investigashonnan ta resultá awor ku e sakamentu di oro na Venezuela tin un lenk direkto ku práktikanan manera mineria ílegal, fuga (huida) di kapital, represhon i eksplotashon. Tin pues indikashon ku trafikashon di e oro akí posibelmente ta bai kompañá pa kriminalidat organisá, trasedental i miná.
Investigashonnan penal ku a ehekutá na e e tres islanan ABC ta duna indikashon ku trafikashon di oro venesolano huntu ku e fluho di plaka prosedé di esaki, por bai kompañá pa kontrabanda (di entre otro droga), falsifikashon di dokumentu i labamentu di plaka. Esaki ta trese riesgonan di integridat i seguridat kuné ku ta enormemente preokupante tantu riba nivel lokal komo internashonal.
Mirando e riesgonan grandi akí, Gobièrnu di Kòrsou ta hasi tur loke ta nesesario pa tuma e medidanan nesesario ku ta yuda prevení pa Kòrsou sufri daño di reputashon internashonalmente relashoná ku trafikashon di oro for di Venezuela. Konsekuentemente, Gobièrnu di Kòrsou a start ku e proseso pa yega na un asina yamá ‘landsbesluit houdende algemene maatregelen’ (LBham), inkluso reglanan spesífiko. Na espera di e legislashon akí lo hasi por lo pronto uso di e reglamento ministerial pa prohibí trafikashon di oro direktamente for di Venezuela òf atraves di otro pais.
