Korsou no por ta man’é un bala di ping pong pa PDVSA

Dia 18 di novèmber 2019 henter parlamento di Kòrsou riba invitashon di Refineria Isla a bai bishita e refineria. E bishita aki a wòrdu proponé pa Refineria Isla ya ku e mesun Refineria Isla den promé instansia sorprendientemente a ninga di presentá den parlamento ora nan a wòrdu invitá den un reunion públiko di komishon sentral pa papia entre otro tokante e periodo despues di 31 di desèmber 2019.

Pa buena marcha parlamento di Kòrsou e ora ei a aseptá un kontra-invitashon i bus di Refineria Isla a bin buska tur parlamentario na Punda unda sra. Flores, direktora di Refineria Isla i sr. Balborda, relashonista públiko a yama kada un parlamentario bon biní.

Durante e bishita parlamentarionan a haña un rekorido ekstenso riba tereno di e refineria i a pasa na e diferente instalashonnan importante. Tambe parlamentarionan a sinta ku un grupo di trahadónan di Refineria Isla ku a ekspresá nan preokupashon pa ku nan trabou den e aña nobo. Na final miembronan di parlamento a sinta ku henter direktiva di Refineria Isla enkabesá pa sra. Flores den un seshon formal. Aki diferente punto importante i sensibel a wòrdu papiá den un esfera ameno pero ku e seriedat nesesario mirando ku un bes ta fin di aña i mester a bini klaridat ta kon e relashon ku Refineria Isla/PDVSA lo bai ta sabiendo ku Klesh lo no por tuma over e refineria pa promé di yanüari 2020 pero un par di luna despues.

Un punto kardinal ku den e kuadro aki a wòrdu diskutí ta ku PDVSA kier a keda un aña mas na Kòrsou den nan senario mas preferí. Pero tambe a bisa parlamento di Kòrsou bon klá ku si un aña pa kualke motibu no tabata alkansabel, PDVSA tabata dispuesto di keda pa kualke periodo ku Kòrsou lo a proponé. Ku otro palabra, kualke periodo despues di 31 di desèmber 2019 pa PDVSA tabata aseptabel. Ku e mensahe aki miembronan di parlamento a terminá nan bishita na Refineria Isla.

P’esei tambe ta inkomprendibel, inaseptabel i hasta kondenabel ku despues di apénas 40 dia, PDVSA den pitu ta hungando un wega ku Kòrsou di ke keda un aña mas den un estilo di ‘take it or leave it’. Kon por ta posibel ku Refineria Isla/PDVSA den un reunion ku representantenan di e órgano di mas haltu di nos pais ta papia di 12 opshon (kada un luna èkstra den un periodo di transishon tabata un opshon aseptabel pa nan) i awor ku ‘puntje komt bij paaltje’ PDVSA ta keda para riba un aña komo e úniko opshon? No por! Parlamento di Kòrsou ta pone bon klá riba mesa ku Kòrsou no ta un bala di ping pòng. Kòrsou, na nòmber di su representantenan di pueblo, mester por konfia ku loke a wòrdu palabrá 40 dia pasá ta algu ku tin su peso, sigur si bo konsiderá ku a palabrá esaki na un momentu hopi krusial anto ku e órgano di mas haltu di nos pais. Òf e wega di faltamentu di rèspèt pa dignatarionan di Kòrsou a lanta kabes atrobe serka PDVSA? Somos hermanos de berdat?