Korsou: A tuma tur medida nesesario abordo di Freewinds pa loke ta e kaso di sarampi

Manera ta konosí e barku FREEWINDS  a yega Kòrsou djasabra dia 4 di mei, mes dia funshonarionan di GGD a kuminsá ku e labornan di investigashon nesesario den kuadro di e kaso di sarampi abordo.

Dòkternan a inspektá e fasilidatnan di isolashon di e barku kaminda e pashènt a keda isolá. Tambe a entrevistá tur persona, tantu pasahero komo tripulante, pa determiná ken ta esnan ku a kore mas riesgo di infekshon i tambe pa identifiká posibel kasonan nobo. Na total a entrevistá 318 persona, 102 pasahero i 216 tripulante, inkluyendo e pashènt mes.

Tambe ku ayudo di profeshonalnan di ADC a kue sanger di tur esnan ku no por a duna prueba di vakunashon kontra sarampi den pasado.

Entretantu a risibí resultado di muestranan ku a manda na laboratorio di RIVM.  ADC a hasi tur esfuerso pa kordiná tur esaki i yuda nos organisá tur dokumentashon pa tambe por entregá tur esnan konserní nan resultadonan individual.

Nos a haña asistensia tremendo tambe di LabdeMed ku a yuda nos tuma èkstra muestra kaminda ta tin mester i analisá esakinan na Kòrsou mes pa nos por kompletá e imágen pa por tuma e siguiente pasonan.

Ademas di esei a sigui averiguá serka mas hende a bordo si tin prueba dokumentá di a vakuna kontra di Sarampi.

Di tur e resultadonan konhunto a konkluí ku:

  • di e tripulantenan a bordo 199 tripulante di e total di 216 a yega di haña sea e malesa sarampi òf e vakuna kontra sarampi den pasado, (92%)
  • i di e pasaheronan a bordo 91 di e total di 102 a yega di haña sea e malesa sarampi òf e vakuna kontra sarampi den pasado, (89%)

Esei ke men ku e grupo aki  (na tur 91 % di tur hende a bordo) tin antikuerpo (antibody) kontra di sarampi i por lo tanto no por kontagiá mas i tampoko pasa e malesa pa otronan.

Tin 4 personanan (3 tripulante i 1 pasahero) di ken mester kue sanger ainda pa konkluí e investigashon serka nan. Esei lo tuma lugá den transkurso di dia.

E personanan ku tin antikuerpo por baha for di FREEWINDS i subi bèk sin ningun restrikshon. Nan no ta forma peliger pa ningun hende.

Te ku djabièrnè 10 di mei no a identifiká niun otro kaso di sarampi abordo di FREEWINDS.

Lo ofresé e grupo ku no tin antikuerpo kontra di sarampi ainda, e vakuna kontra di e vírùs aki.

Tur esnan abordo ku NO ta protehá kontra di Sarampi (esta por lo pronto 17 tripulante i 11 pasahero) NO tin mag di baha for di barku.

Esei ta keda na vigor te ku dia 13 di mei. For di dia 14 di mei nan tambe tin mag di baha pasombra despues di e fecha ei no tin chèns mas pa kontagiá otro hende.

Nos por a hala e fecha ei mas serka pa motibu ku e medidanan di isolashon riba e barku tabata estrikto, inkluyendo e echo ku e sistema di airu den e kamber di isolashon tabata esun rekomendá den un situashon asin’aki. E sistema ta unu ku ta saka e airu pafó di e barku i no ta sirkulá mas bèk paden di e barku.

Esei ke men ku for di dia ku a isolá e tripulante serka ken a konfirmá sarampi, no tabatin chèns mas pa kontagiá niun hende. E periodo di 21 dianan den kual hende ku por a kontagiá promé ku esei ta terminá riba 13 di mei.

Tur medida tumá, investigashon realisá i trabounan ehersé abordo dor di funshonarionan di salú lokal a sosodé den deliberashon kontinuo ku entidatnan di salú internashonal ku Kòrsou ta kolaborá kuné CARPHA, RIVM i PAHO.

Pa loke ta trata investigashon bou di hendenan lokal ku a bishitá FREEWINDS por reportá lo siguiente:

Na total tabatin kontakto ku 151 bishitante. Mayoria di esakinan ta hende ku a tuma kontakto ku GGD manera a pidi den e promé komunikadonan di prensa tokante sarampi. Tabatin hende tambe ku GGD mes a yama, esakinan tabata riba lista di bishitante ku nos a risibí di a barku. Kasi tur hende a bishitá e barku dia 23 òf 28 di aprel último. Esei ta despues ku e persona konfirmá ku sarampi a bordo a isolá kaba. Sinembargo, lo sigui monitoreá personanan ku a indiká di tin un òf otro síntoma paresido na esnan di inisio di sarampi te e delaster dia ku e malesa por  manifestá kalkulá pa e grupo aki, ku ta dia 13 di mei.

Comments

comments