Koningsspelen 2020 ta wòrdu kanselá

114

Debí na e desaroyonan rondó di Covid-19 ku ketu bai ta perdura i ta trese hopi inseguridat, mester a kanselá e Weganan di Rei 2020. Maske e organisashon lokal tabatin e speransa ku e krísis por pasa pronto, na e momentonan aki no ta responsabel pa kontinuá ku preparashon di e dia Deportivo aki.

Kada Isla ta kompletamente liber pa organisá e aktividat. Ta p’esei Kòrsou a skohe pa organisá esaki un siman despues ku e lo a tuma luga na Hulanda. Motibu pa esei tabata pasobra esun di Hulanda lo a tuma lugá durante fakansi di Pasku di resurekshon i a skohe pa organisá e di 8 edishon riba djabièrnè 24 di aprel próksimo. Pero maske mayoria di e paketenan deportivo a yega kaba, en bista di e ‘lockdown i último desaroyonan mester kanselá e dia deportivo na Kòrsou tambe.

Koordinadó Mavis Albertina ta reiterá: “Klaro ku esaki ta duel nos inmensamente, pero salú públiko ta bai riba tur kos. Nos ta gradisí tur skol, organisashonnan deportivo i boluntarionan ku a start e  preparashonnan di Koningsspelen, danki pa boso esfuerso i sostén. Nos ta apresiá esaki masha.”

E aña aki un rèkert grandi di skolnan básiko a inskribí representando mas di 18 mil mucha. E próksimo edishon di Koningsspelen ta tuma lugá na aprel 2021.