Minister Camelia- Römer a hiba un bishita di trabou di 22 pa 30 sèptèmber 2017 na PAHO Washington Headquarter i a partisipá na e “29th Pan American Sanitary Conference”. Minister tabata presente tambe na e “69th Session Of The Regional Committee of WHO For The Americas” i e “Thirty-Third Meeting of the Council for Human and Social Development (COHSOD)”.
Tabata shete dia di trabou intensivo kaminda hopi presentashon riba diferente tópiko a keda duná. E tópikonan ku mas a hala atenshon banda di kon pa finansiá, outomatisá i fortalesé sistema di salubridat di un pais ta “Non Communicables Diseases”
(NCD). NCD ta enserá malesanan manera diabétis, preshon haltu i malesanan di kurason. NCD ta kousante di mas ku 65% di morto (ku por keda prevení) rònt Karibe i Latino Amérika. Netamente pa e motibu aki PAHO a desaroyá pa algun aña kaba un maneho stratégiko i un plan di akshon kon pa minimalisá i prevení NCD. Minister tabatin interkambio ku direktor di PAHO señora C. Etienne, ku por sierto a keda reeligí pa sirbi su di dos tèrmino komo direktor. Tambe a elaborá ku diferente kolega Minister di den region i ku direktornan di organisashonnan di den region manera Carpha, UWI, Chronic Diseases Research Centre riba
problemanan di salú komun i posibilidat di koperashon mutuo.
Kombersashon a keda hibá tambe ku embahador di Hulanda na Washington. E bishita a resultá fruktífero i a sera diferente laso di koperashon den region i a estrechá lasonan ku PAHO. Komo resultado di tur esakinan lo tin tres evento ainda den 2017 ku Ministerio di GMN lo haña sosten tékniko di PAHO. Lo bai tin dos workshop riba e tópikonan di Salú Seksual Reproduktivo i Salú Mental i na komienso di novèmber lo tin un konferensha na Kòrsou riba NCD. Minister Camelia- Römer ta sigui traha pa yega na un Kòrsou mas salú.
