Dia 20 di sèptèmber 2018 Komishon Fiho di Hustisia di Parlamento a keda risibí pa e team di maneho di SDKK (Sentro di Detenshon i Korekshon Kòrsou), esaki e kuadro pa tin mas interkambio di informashon i asistensia di Parlamento, kaminda ta nesesario, den e kadena hudisial.
E team di maneho a hasi un presentashon na e miembronan di komishon ku tabata presente di e diferente areanan i retonan finansiero, material i laboral ku e instituto aki ta konfrontá tantu riba tereno di preparashon, ehekushon i kontinuidat riba e diferente aspektonan ku SDKK tin ku deal kuné tur dia di nobo pa tene e instituto aki ‘ up and running’. Ademas a deliberá riba e aspekto legislativo i e atenshon pa ku nesesidatnan di e klientenan di SDKK tambe a keda ampliamente ilustrá.
Despues di risibí un rekorido na un parti di e instalashonnan di SDKK kaminda miembronan a mira klientenan tumando algun kurso, riba petishon di komishon, e miembronan presente a sinta ku algun kliente den nan kalidat komo representante di e diferente blòknan den SDKK.
Durante e interkambio aki e representantenan a trese diferente punto di atenshon dilanti riba e.o. tereno di infrastruktura, atenshon personal, enseñansa i salubridat. Tambe e akoplashon na e merkado laboral i integrashon bek den nos sosiedat despues ku e klientenan bandoná SDKK a keda ampliamente diskutí. Mirando e importansia di e instituto aki i tur e diferente puntonan ku a keda pendiente e palabrashon a keda hasi ku komishon lo hasi su esfuerso pa bini bek SDKK promé ku fin di aña 2018. Komishon ke gradesí e team di maneho di SDKK pa risibí i interkambiá ku nos i tambe pa duna e oportunidat na e representantenan di klientenan di SDKK pa interkambiá ku miembronan presente riba nan puntonan di interes.
