KLM cu ultimo buelo awe: Te despues di Coronavirus

Awetardi a yega Aruba e ultimo buelo di KLM pa awo for di Amsterdam. Despues di 1 ora di tempo, e avion a regresa Hulanda cu e ultimo Hulandesnan cu a keda pega na Aruba dor di e Coronavirus. Cu e buelo aki tambe, KLM a anuncia di ta stop tur buelo por lo pronto te na luna di Mei. Aunke cu mester evalua e situacion na e momento ey pa determina ki dia lo reanuda buelonan largo manera esun pa Aruba.

Awe e CEO di KLM a bisa na Hulanda cu nunca den nan 100 aña di existencia, nan a yega di pasa dor di un crisis asina serio. Nan ta operando apenas 10% di nan buelonan y e gran mayoria di nan avionnan ta na tera, specialmente e Boeing 747 nan cu lo a sali durante aña pero awo a saca nan adelanta. Ta realisando algun buelo so mas den Europa, specialmente pa move carga. Tin 2000 empleado ta den proceso pa perde nan trabou. KLM ta e di dos compania cu ta emplea mas trahado na henter Hulanda!

Awe KLM a realisa su ultimo buelo pa Aruba…te cu luna di Mei atrobe despues di crisis di Coronavirus

Awe KLM a realisa su ultimo buelo pa Aruba…te cu luna di Mei atrobe despues di crisis di Coronavirus

Posted by 24ora on Saturday, March 28, 2020

Dia 7 di october 2019 tabata exactamente 100 aña pasa cu e pionero den aviacion Albert Plesman a funda e compania Koninklijke Luchtvaart Maatschappij – KLM. Mester bisa acerca cu KLM a yega pa prome biaha na Aruba riba un diadomingo dia 23 december 1934 cu e avion ‘Fokker F 18’ – ‘De Snip’, pues fin di aña pasa KLM a cumpli 85 aña bulando pa nos isla.

KLM ta conoci pa ta un compania stabil, no solamente den existencia di su operacionnan, pero tambe pa cu su buelonan, cu ta sali y yega na tempo pa nan destinacion. Mundialmente, KLM ta e compania mas bieu y cu te ainda ta bula bao di su propio nomber. Un di e atraccionnan cu KLM ta hopi conoci p’e pa esnan cu ta bula riba nan business class, ta cu nan ta ofrece un casita porcelana di ‘Delfts Blauw’ na nan pasaheronan.

Pa bay bek un poco den nos historia, ta bon pa sa cu na aña 1934 a introduci buelonan comercial na Aruba y dia 15 di December 1934 un buelo hopi special a sali for di Schiphol- Amsterdam. E avion tipo Fokker F-19 cu nomber ‘Snip’ a sali rumbo pa Antias cu un crew di 4 persona di KLM abordo kendenan a prepara pa varios aña (!) prome cu nan por a realisa e buelo largo aki. Nan a stop na nos isla ruman Corsou unda nan a yega pa prome biaha dia 22 di december y dia 23 di december nan a yega pa prome biaha Aruba riba un beach/landing strip na Savaneta. Na aña 1935 nan a inicia cu buelonan scheduled pa nos isla unda entre otro por a mira ’Oriol’ y ‘Convair’.

Pa studiantenan por a sigui nan estudionan avansa na Hulanda, KLM a manda avionnan manera Super Constellation pa Aruba y Corsou pa busca studiantenan Antiano. 

Awendia, KLM ta bula diariamente for di Schiphol pa Aruba, cual no solamente ta trece bishitantenan for di Hulanda pero tambe for di mercadonan Europeo, manera Inglatera, Alemania, Belgica, Italia y Scandinavia-entre otro.