KLM a cumpli 100 aña di existencia di cual 85 aña bulando pa Aruba

1208

Dialuna awo dia 7 di october 2019 ta exactamente 100 aña pasa cu e pionero den aviacion Albert Plesman a funda e compania Koninklijke Luchtvaart Maatschappij – KLM. Mientras cu ta celebra esaki mundialmente, ayera a celebra na Aruba. A recorda cu aki KLM a yega pa prome biaha riba un diadomingo dia 23 december 1934 cu e aparato ‘Fokker F 18’ – ‘De Snip’, pues fin di aña KLM ta cumpli 85 aña bulando pa nos isla.

KLM ta conoci pa ta un compania stabil, no solamente den existencia di su operacionnan, pero tambe pa cu su vuelonan, cu ta sali y yega na tempo pa nan destinacion. Mundialmente, KLM ta e compania mas bieu y cu te ainda ta bula bao di su propio nomber.

Un di e atraccionnan cu KLM ta hopi conoci p’e pa esnan cu ta bula riba nan business class, ta cu nan ta ofrece un casita porcelana di ‘Delfts Blauw’ na nan pasaheronan. Pa e celebracion di 100 aña, e edicion special lo wordo revela riba e dia di nan 100 aña di existencia, esta dia 7 di october.

Durante e añanan, KLM a hunga un rol importante den desaroyo di e industria turistico di Aruba, cu lasonan fuerte y duradero.

Pa bay bek un poco den nos historia, ta bon pa sa cu na aña 1934 a introduci buelonan comercial na Aruba y dia 15 di December 1934 un buelo hopi special a sali for di Schiphol- Amsterdam. E avion tipo Fokker F-19 cu nomber ‘Snip’ a sali rumbo pa Antias cu un crew di 4 persona di KLM abordo kendenan a prepara pa varios aña (!) prome cu nan por a realisa e vuelo largo aki. Nan a stop na nos isla ruman Corsou unda nan a yega pa prome biaha dia 22 di december y dia 23 di december nan a yega pa prome biaha Aruba riba un beach/landing strip na Savaneta.

Na aña 1935 nan a inicia cu buelonan scheduled pa nos isla unda entre otro por a mira ’Oriol’ y ‘Convair’.

Pa studiantenan por a sigui nan estudionan avansa na Hulanda, KLM a manda avionnan manera Super Constellation pa Aruba y Corsou pa busca studiantenan Antiano. 

Awendia, KLM ta bula diariamente for di Schiphol pa Aruba, cual no solamente ta trece bishitantenan for di Hulanda pero tambe for di mercadonan Europeo, manera Inglatera, Alemania, Belgica, Italia y Scandinavia-entre otro. 

Durante aña 2018, KLM a trece un total di 34.373 bishitante pa nos destinacion, cu ta representa un crecemento di 8.7% compara cu aña 2017. Compara cu aña 2011 – ora cu A.T.A. a bira independiente, por mira cu a crece cu 195%.

A.T.A., incluyendo su oficinanan na Europa y na Den Haag, ta mantene lasonan fuerte cu KLM. Como tal, A.T.A. Europa ta participa den varios evento, entre otro un di e campeonatonan mas grandi di Golf, e asina yama ‘KLM Golf Open’. Tambe ta bon pa menciona e cooperacion anual entre A.T.A. y KLM pa loke ta trata e famoso KLM Marathon, cu a bira un evento importante pa nos isla como destinacion.

Den weekend cu a pasa, KLM a celebra su aniversario na Aruba. Durante e acontecimento tabata presente Gobernador Yvonne Lacle y Prome Minister di Aruba, mr. Evelyn Wever-Croes.

Den su discurso durante e anochi ameno, C.E.O. di A.T.A., Ronella Tjin Asjoe-Croes a laga sa cu “E lasonan fuerte y profesional cu e compania mas bieu di aviacion mundialmente ta algo cu Aruba ta aprecia y balora hopi”.

Como recuerdo a entrega un bunita obsekio na Cees Ursem, Country Manager di KLM region Caribense como muestra di felicitacion y sigur aprecio pa cu e lasonan fuerte cu e compania KLM.