Kiwanis San Nicolas a honra Agente Policial Raigel Hoen pa su acto heroico

Diasabra tabata un dia hopi peculiar pa Agente Policial Raigel Hoen. El a comenta cu e dia tabata basta druk, mirando cu e ta un agente policial. Ora cu el a caba cu algun asistencia, a haya melding di central pa bay Mangel Halto pa reforsa un patruya cu tabata ey caba, mirando cu tabata tin tres hende riba kayak den problema.

Na e sitio, a puntra pa Maritiem y Kustwacht, sinembargo Central a bisa cu nan no lo yega e momento ey. E agente no a perde pa gana y a avisa su comandante di patruya cu mirando cu e kayak tabata bayendo afo, e ta bay drenta awa y yuda nan. El a kita su uniform y drenta awa y yuda esnan riba e kayak, pa bin bek canto. Agente Hoen a sinti su mes hopi bon despues di e rescate aki.

Kiwanis San Nicolas a honra Agente Policial Raigel Hoen pa su acto heroico

Kiwanis San Nicolas a honra Agente Policial Raigel Hoen pa su acto heroico. Click link pa mas https://24ora.news/3dUu0YO

Posted by 24ora on Thursday, June 11, 2020

Su coleganan no por a kere cu tur esey a sosode. Nan no tabata kier na prome instante pa el a bula awa, pero despues nan mes a sostene. Haciendo algo asina aki, Hoen sigur lo conseha su coleganan pa haci e mesun cos, e ta un cos bon, y ta bin di bo mes. Por ultimo Hoen a menciona cu si bo no tin custumber di ta riba lama, ta conseha pa bay cu un persona cu si tin e experiencia ey. Lama no ta coy confia. “Un otro biaha cu bo kier bay lama, bay cu un hende cu sa di lama y no djis bay zomaar. Tur hende gusta lama, pero e no ta coy confia,” el a bisa.

Agente 1ste Klasse Hoen den pasado tabata landa den seleccion Aruba Dolfins, pero semper e pasion pa landamento a keda. Hasta el a forma parti team di waterpolo.

A honra un heroe

Di parti di Kiwanis San Nicolas, Alvin Molina, kende por cierto tambe ta forma parti di Cuerpo Policial, a menciona cu nan tabata t’ey e biaha aki pa celebra un acto di un polis hoben kende a destaca door di un accion, poniendo su mesun bida na peliger. Den esey a scapa dos hobencita cu por ta por a perde nan bida riba lama. Diariamente sa tin polis, otro civilnan cu ta haci actonan hopi bunita, pero esaki a destaca su mes asina hopi cu a bisa cu mester haci algo special pa e agente policial aki. Esaki sigur lo encurasha mas hende pa haci tipo di actonan asina. Segun Molina esey ta e intencion tambe di e aprecio cu ta demostra na e polis aki, pa asina mustr’e cu su actonan ta wordo aprecia y na e mesun momento motiva otronan pa tambe haci esey.

Otronan cu kisas no a haya e aprecio, pero di e forma aki kier duna un aprecio na tur e heroenan aki na Aruba pa sigui cu e bon trabao. Di mes door cu ta di Kiwanis, vooral pa e muchanan, cu hopi biaha ta vulnerabel. Awendia na mundo tin hopi critica riba polis. Tin cu bisa cu lastimamente hustifica. Ora cu momentonan asina bin cu polis ta haci un trabao bunita, no mag di laga e chens ey pasa pa elogia e agente ey tambe. No por evita cu e hoben agente aki ta un rolemodel. E atencion cu e ta haya den tur forma den media, ta demostra cu hopi hende ta wak na dje y e hobennan sigur lo haya un extra push pa tambe sigui den e direccion ey. Un palabra di aprecio ta bay sigur pa agente 1ste klasse Raigel Hoen pa su heroismo.