Dia 13 di februari ta haci un luna cu antisocialnan a cende Scol Cacique Macuarima na candela y a causa un daño enorme na e scol, cu a stroba e muchanan pa sigui cu nan lesnan.
Hopi cos a bay perdi, pero esaki no a kibra e animo ni di alumno como e docentenan. Pa e motibo aki mes Kiwanis San Antonio ta organisando e Youth Take Over Neon Jump Up Edition, cual lo ta dia 18 di februari, cuminsando for di 7’or pa 11’or di anochi, segun presidente di e club, Joshua Muyden.
Por cumpra ticket na Citgo Boulevard, Citgo Santa Cruz of na administratie di Colegio San Antonio. Ta recaudando fondo pa Scol Cacique Macuarima, pa asina duna un man.
Ta invita pueblo di Aruba pa bin apoya y claramente e hobennan di cualkier scol, no ta importa di unda, djis bin, have fun na un manera sano, positivo y na un manera dushi.
Priscilla Werleman, Vice presidente di e club a comenta cu e ruta ta di Veld di Winston te cu Weng Kee, compaña pa Youth Extreme. E ta inclui un glow stick, un glow pen, un T-shirt y ticket pa refresco.
Corda trece boso mesun cup pa asina cuida nos medio ambiente. Pone dia 18 di februari riba boso calender, bin pasa dushi, bin pasa bon hunto cu Kiwanis San Antonio y alabes aporta na un bon causa.