Kiwanis club of aruba cu un evento inolvidabel pa nos grandinan

Recientemente Kiwanis Club of Aruba a organisa un “Elderly Party”, cu e meta principal pa ofrece nos grandinan un dia placentero y inolvidabel. Esaki ta sosode pa basta aña caba y e biaha aki mas o menos 70 persona por a disfruta di un mainta ameno yen di actividad interesante.

ADV

E evento a cuminsa cu un concierto musical priva presenta door di Sr. Etty Toppenberg, cu por cierto a bay bek den tempo cantando diferente cantica. Despues di mas o menos un ora, Aruba Salsa a continua e programa cu un workshop ofreciendo nos grandinan un splicacion amplio con pa marca nan paso salsero. Un ora prome cu lunch, e boluntarionan di Kiwanis Club of Aruba a dirigi un Bingo na unda nos grandinan por a gana varios premio humilde.

Por ultimo, un bes mas e boluntarionan di Kiwanis Club of Aruba, a percura pa nos grandinan por a disfruta di un dushi cuminda di merdia, incluyendo un bebida social segun escogencia personal. Na final di e evento nos grandinan a ricibi un tas cu varios producto practico, cu mas tanto a keda patrocina door di varios compania local. Un danki special ta bay na e siguiente sponsor y/of personanan cu a haci e evento aki exitoso: Aruba Salsa, Botica Aloe, Botica Paradera, Elite, Op=Op, Orange City Aruba, Rode Kruis Aruba, SETAR, Waiter na Warda, Sr. Etty Toppenberg y Sra. Janine Rodriguez.

Kiwanis Club of Aruba ta forma parti di Kiwanis International desde 1965 sirbiendo su comunidad pa medio di varios proyecto y su Service Leadership Programs (Key Club of Colegio Arubano, Key Club of Colegio San Nicolas, Aktion Club Sonrisa, Builders Club of Mon Plaisir, Kiwanis Circle K of Colegio EPI). E meta di Kiwanis International ta pa mehora e mundo door di haci un diferencia positivo y duradero den e bida di nos muchanan.

Comments

comments