Banco di Caribe, Ennia y Kiwanis Club of Aruba ta uni un biaha mas pa e proyecto di “Global Money Week Aruba” organisa pa Banco Central di Aruba. “Global Money Week Aruba (GMWA)” ta forma parti di e plataforma internacional di “Global Money Week”, un evento educacional cu ta tuma luga mundialmente cada aña y cu ta enfoca riba educacion y conscientisacion den e area financiero. E meta ta pa educa nos futuro generacion den un manera interactivo di e diferente areanan di placa: con pa traha placa, con pa spaar placa, con pa uza placa na un manera responsabel y con pa duna bek na e comunidad.
E aňa aki, e scolnan cu ta participa ta Colegio Sagrado Curason y Reina Beatrix Basisschool. E studiantenan di 5e y 6e klas a ricibi un presentacion di 3 diferente tema.
E temanan ta:
- Gasta y Spaar;
- Gana Placa;
- Comparti.
A base di e presentacion, e studiantenan por haci un escogencia pa cu e tema di nan preferencia.
E tema “Comparti” ta wordo patrocina pa Banco di Caribe, Ennia y Kiwanis Club of Aruba y tin como meta pa inspira nos studiantenan y demostra nan e importancia di duna bek na nos comunidad y e diferente maneranan con pa haci esaki.
Den e presentacion, e studiantenan por a observa dos video di dos diferente fundacion na Aruba, cual ta Cruz Cora Aruba y Fundacion Pa Nos Comunidad (FPNC), pa asina nan por haya mas informacion di e dos fundacionnan aki cu ta haci hopi pa e comunidad di Aruba.
E studiantenan tin como tarea pa traha den grupo y asina “brainstorm” diferente ideanan con pa colecta mas fondo y trece mas conscientisacion pa un di e dos fundacionnan. E grupo cu bin cu por presenta e miho idea lo ta e ganador di e tema “Comparti”.
Pa mas informacion tocante e actividadnan di Global Money Week por bishita e Facebook page y Instagram di Global Money Week Aruba.
Banco di Caribe, Ennia y Kiwanis Club of Aruba ta desea e muchanan hopi exito!
