Banda cu tabatin un ansha di otro mundo pa core pasa e reforma fiscal, ta resulta awo cu e proposicion cu Gabinete MEP-POR-RED a presenta ta den fase y cu meta principal pa trece miyones den caha di gobierno. Den e tratamento di e ley a prohibi tur comerciante pa inclui e impuesto BBO-BAZB-BAVP riba e recibo. Si e comerciante haci’e toch, lo castig’e cu un multa di Afl. 10.000,=. “Tur impuesto mester ta inclui den prijs di e producto of servicio awor pero ta keda toch dificil pa e consumido por midi con hopi e prijs a subi”, asina Jennifer Arends-Reyes, miembro di Parlamento pa e fraccion di AVP, a duna di conoce.
Segun e ley, meta tras di e cambio aki ta pa transparencia pero alabes e ta crea un espacio pa comerciantenan pasa tur e gastonan cu nan tin extra, di utilidad, di transporte, di ganashi, di banco y di huur den e prijs pa consumido paga. Si den e prome fase di reforma fiscal tin personanan ta bay dilanti cu Afl. 25,- pa luna y tin cu paga riba Afl. 200,- extra na aumento di producto, servicio y impuesto en berdad e no ta un adelanto pa ningun hende.
Durante di un sesion na October 2018 organisa pa Raad van Advies cu tawata papia di e cuadronan fiscal cu ta existi, a delibera den grupo kico ta realistico pa Aruba, sigur e BTW manera cu algun politico di coalicion ta primintiendo nan votadonan, no ta un opcion administrativamente viabel pa Aruba. E top expertonan y profesionalnan fiscalista di Aruba incluyendo profesionalnan cu ta traha cu CAFT tawatey durante e Masterclass y tur tawata di acuerdo cu BTW no ta un opcion pa Aruba pa diferente motibo.
E sistema di BTW ta uno cu mag di cobra un schakel so y mester por demostra esaki via recibonan y ta netamente esaki ta haci cu na Aruba pa falta di entre otro personal y digitalisacion, un tarea masha dificil. Pues pa tanten a keda e impuestonan tipo BBO cu conoce schakel y cu awor desde 2019 ta keda na e comerciantenan con hopi nan lo absorba of hinke plus otro gastonan den nan prijs.
Inflacion ta sigui crece, placa no ta yega manera antes mas y ta tristo cu ta culpa tur e aumento di impuesto riba gobierno anterior pa paga debe siendo cu despues cu gobierno a cobra varios suma cu tawata pendiente ainda ta sigui aumenta gastonan y no kier pone locual ta e ‘meevallers’ of locual ta extra cu ta cobrando pueblo pa baha e debe tampoco.
A bisa cu lo kier inverti den pueblo pero door di kita placa di pueblo, reduci poder di compra, hisa costo di bida y costo di operacion no lo tin suficiente fondo pa repara e daño cu ta causando entre otro riba tereno social, caminda tur mayor lo mester traha aun mas duru, talves mas cu un trabou, e bida familiar ta bai atras y cu por tin consecuencianan drastico pa e hobennan y muchanan, asina Jennifer Arends-Reyes a termina bisando.
