Un team di 24ora.com a subi caya pa puntra e ciudadanonan kico nan ta pensa di e posicion tuma door di Hulanda pa e islanan, pa pone condicionnan pisa pa duna un prestamo.
Apesar cu a haya un variedad den e contestanan, por bisa cu ta sinti cu no kier perde autonomia. Tin hende no ta importa si tin supervision financiero, y otronan ta bisa cu esaki ta hiba Aruba hopi aña bek den pasado.
Otronan ta bisa cu Hulanda ta hacie pasobra Aruba ta pertenece na Hulanda, pero nan no por bin cu exigencianan asina pisa. Hulanda tin deber di yuda, pero no cu e exigencianan cu nan ta pone.
Apesar cu nan ta contra di e condicionnan, nan ta sinti cu Aruba a perde su autonomia caba y ta preocupa pasobra no kier pa bay cay bou di Hulanda atrobe.