‘Kidpreneur$ With BIG Ideas’ cu presentation di SDGs na Traimerdia Noord

E programa ‘Kidpreneur$ With BIG Ideas’ di IDEA ta continua e aña aki y actualmente e Traimerdia na turno ta esun na Noord. 

E meta di e proyecto aki ta pa duna e muchanan di e klasnan mas halto di scolnan basico workshops pa stimula nan pa pensa riba e posibilidadnan pa bira un futuro empresario. Parti di e programa di ‘Kidpreneur$ With BIG Ideas’ ta pa conscientisa muchanan riba e Metanan Mundial pa un Desaroyo Sostenibel (SDGs) y con pa uza e metanan aki den nan accionnan diario.

Diaranson, dia 20 di maart 2019, e muchanan di 5de y 6de klas di Traimerdia na Scol Basico Washington, a haya un presentacion di SDGs adapta na nan edad y despues a hunga un wega di mesa crea y diseña pa United Nations Regional Information Centre (UNRIC), conhuntamente cu ELYX by Yak. Di e forma aki nan ta cera conoci cu e enfokenan mundial.

E muchanan a participa activamente, haciendo pregunta y contando ehempelnan for di nan perspectiva. Tambe e muchanan a haci uzo di nan sabiduria contestando e preguntanan di e wega relaciona cu e tema. E potretnan adhunto ta ilustra e atencion cu e muchanan tin riba e presentacion di SDGs y con concentra y entusiasma nan tabata pa por gana e wega.

IDEA lo sigui cu mas workshop na e Traimerdianan na Aruba pa sigui stimula e Kidpreneurship den nos muchanan. Nos ta gradici sra. Gisela Kadir, beleidsmedewerker di Sustainable Development Planning di Departamento di Asuntonan Economico, Comercio y Industria, pa facilita e workshop di SDGs na nos muchanan.