Despues di siglo y siglonan di eurocentrismo – tanto den e arte como den religion – a sedimenta e imagen mas conoci di Hesus: un homber blanco, cu barba, cabey largo bruin cla y wowo blauw.
Apesar di ta un potret ya conoci pa mayoria di e cerca di 2 mil miyon di Cristian cu tin rond mundo, ta trata di un recreacion cu tin poco di haber cu realidad.
E Hesus historico, experto ta señala, probablemente tabata bruin, estatura abao y tabata mantene e cabey corta, manera e otro Hudiunan di su epoca.
E dificultad pa sa con Hesus tabata luci, ta bin di e mesun origen di Cristianismo: e Testament Nobo, e parti di Bijbel cu ta nara e bida di Hesus, no ta haci ningun descripcion di su aspecto.
“E evangelionan no ta describi’e fisicamente, no ta bisa si e tabata halto of cortico, nechi of fuerte. E unico cos cu nan ta bisa ta su edad, mas of menos 30 aña,” e historiado Neozelandes Joan E. Tayler, autor di e buki nobo What Did Jesus Look Like? Y profesor di e Departamento di Teologia y Estudionan Religioso di King’s College di London, Reino Uni, a bisa.
“E ausencia di dato aki ta hopi significativo. Parce ta indica cu e prome siguidornan di Hesus no tabata preocupa pa tal informacion, cu pa nan ta mas importante registra e ideanan cu bisa con e tabata fisicamente,” e historiador, Andre Leonardo Chevitarese, profesor di e Instituto di e Universidad Federal di Rio de Janeiro y autor di e buki “Jesus Historico. Un brevisima introduccion”, a bisa.
Na 2001, pa un documental produci pa BBC, e experto forense den reconstruccionnan facial Britanico, Richard Neave a uza su conocementonan cientifico pa alcansa un imagen cercano na e realidad.
For di tres craneo di siglo I, di habitantenan antiguo di e mesun region unda Hesus lo a biba y e y su ekipo a recrea, uzando modelado 3D, un cara tipico cu por tabata esun di Hesus.
E skelet di Hudiunan di e epoca aki a mustra cu e haltura tabata di 1,60 y cu e gran mayoria di e hombernan tabata pisa poco mas di 50 kilo.
Taylor, autor di e buki nobo, a yega na conclusionnan similar riba e fisonomia di Hesus. “E Hudiunan di e epoca taabta biologicamente similar na e Hudiunan Iraki di awendia, asina cu mi ta kere (Hesus) tabata tin e cabey bruin scur pa preto, wowo bruin cla, cuero color bruin, un homber tipico di Medio Oriente,” e ta afirma.
Bruin y cabey largo
E diseñador grafico Brasileño Cicero Moraes, specialista den reconstruccion facial forense, a crea un imagen cientifico di Hesucristo a peticion di BBC Brasil.
Moraes ta comenta cu “(Hesus) ciertamente tabata bruin, considera e cuero di personanan di e region aki y principalmente analisando e fisonomia di hombernan di desierto, hendenan cu ta biba bao di e solo intenso.”
Otro cuestion interesante ta e cabey di Hesus.
Den e Epistola pa Corintionan (un di e bukinan di Bijbel), apostel Pablo ta skirbi cu “ta un deshonra pa hende homber tin e cabey largo,” pa cual Hesus no lo tabata tin cabey largo, manera sa wordo ilustra.
“Pa e mundo Romano, e apariencia aceptabel pa un homber tin, ta pa hiba e barba feita y cabey cortico. Aunke den antiguedad e filosofonan probablemente tabata laga nan barba largo,” e historiador Joan Taylor ta afirma.
Profesor Leonardo Chevitarese, autor di e buki “Hesus Historico. Un brevisima introduccion,” ta bisa cu e prome iconografianan conoci di Hesus, cu ta data di silgo II, ta mustr’e como un hoben cu poco cabey na carta y di cabey cortico.
“E tabata parce mas un hoben filosofo, un profesor, cu un dios barbudo,” el a detaya.
E investigador Wilma Steagall, profesor di e Pontificia Universidad Catolico di Sao Paulo y miembro di e Sociedad Brasileño di Teologia Ciencianan di Religion, ta señala cu “den e centro di e iconografia paleocristian, Cristo ta aparece bao di diverso representacion: cu barba, manera un filosofo of maestro; of cu poco cabey na cra, cu un cara Apoloneo, cu un tunica, cu e semblante di dios Solo of di un humilde pastoor.”
Figura divino
Taylor, autor di e buki nobo, ta kere cu e imagennan cu a wordo uza a lo largo di e siglonan, semper nan a purba di retrata Cristo, pa bisa, e figura divino, di e yiu di Dios y no na e Hesus Humano.
“Esaki ta un asunto cu semper a fascinami, mi tabata kier a wak Hesus, evidentemente,” el a bisa.
E representacion di e Hesus barbon y yena cu cabey a surgi den e Edad Media, durante e piek di e imperio Bizantino.
Manera cu profesor Chevitaese ta recorda, e figura di Cristo a cuminsa mustra na ta un ser invencibel, semehante fisicamente na e rey y emperadornan di e epoca.
E sociologo Francisco Borba Ribeiro Neto, coordinador di e Nucleo Fe y Clutura di e Pontificia Universidad Catolico di Sao Paulo, ta bisa cu “a lo largo di historia, e representacionnan artistico di Hesus y di su cara poco biaha tabata preocupa pa presenta e ser humano concreto cu a habita Palestina na inicio di e era Cristian.”
“Den e iglesianan Catolico di Oriente, e imagen di Cristo mester sigui un serie di regla pa e wordo transmiti e otro percepcion ey di e realidad di e personahe. Por ehempel, e ta carga su cabes na hato cu lachi entre e wowonan cu ta sugeri sabiduria y capacidad di wak mas leu di e mundo material,” Ribeiro Neto ta agrega.
“Den e escenanan cu varios persona, e semper ta mustra mas grandi, loke ta indica su superioridad riba e ser humano normal; y riba e Cruz e ta representa bibo y den gloria, sugiriendo su resureccion,” e ta conta.
Como cu e Iglesia occidental no a sigui tal normanan, e artistanan cu a representa Cristo a lo largo di e siglonan a cree na nan modo.
“E por ta un figura suave den hopi imagennan Barroque of un Cristo sufri y martilisa manera den e obranan di Caravaggio of Guya,” e sociologo Ribeiro Neto a sostene.
“E problema di e representacion fiel na e personahe historico ta un cuestion di nos tempo, ora cu e reflexio critico a mustra e formanan di dominacion cultural den e representacionnan artistico,” e sociologo ta sigui mustra.
“Den e sentido aki, e problema no ta pa tin un Cristo cabey geel cu wowo blauw. E problema ta cu ta pensa cu e divinidad mester presenta cu faccionnan Europeo pasobra esakinan ta representa esnan cu ta ariba riba e ‘escala social,” Ribeiro Neto ta lamenta.
E distancia aki entre e Hesus “Europeo” y e fielnan nobo di paisnan lehano, segun e historiador Chevitarese, a reduci den e buskeda di un representacion hopi mas intermedio di un “Hesus etnico.”
“Imagennan di Hesus na Macao, e antiguo colonia Portugues na China, ta mustr’e cu wowonan schuins, cu e forma di bisti di un Chines. Na Etiopia, tin registronan di un Hesus cu rasgonan negro,” e ta añadi.
