Diamars 22 di September KIA a celebra 30 aña di existencia y Minister di Husticia mr. Andin Bikker diamars merdia a bay felicita staff y personal di KIA cu e celebracion. Den e trayectorio di 30 aña ainda tin 10 hende den servicio cu a inicia cu KIA 30 aña pasa y na luna di februari Minister Bikker a percura pa nan tur a haya nan reconocimento. Un gran mayoria di e empleadonan no a conoce e trayectorio di mudamento di Huis van Bewaring pa e prizon nobo.
Den e mandatario su discurso el a bisa cu momento un persona haya su sentencia y cay cera ta na KIA e personal mester atende cu ne y hopi biaha den circunstancia y reto dificil. Den e ultimo añanan di gobernacion, gobierno y Ministerio di Husticia a percura pa diferente upgrading na e edificio existente y por bisa cu ainda tin diferente proyecto andando y ta di lamenta cu situacion di Covid a haci cu a haya un retraso den algun proyecto.
Pa loke ta siguridad pa combati Covid, Minister a elogia tur e trahadonan cu a tuma e safety na serio y e situacion ta hopi bon contene. Tambe Minister Bikker a gradici gerencia y special dokter Aron Verschuur cu for di luna di februari ta aplica su experticio pa contene e pandemia den KIA. Den e cuadro financiero Ministerio di Husticia lo sigui yuda KIA cu e apoyo pasobra ainda tin hopi reto y e trabou no ta caba nunca.
Si mira e lista di loke mester a drecha na KIA tin un adelanto y lo bay sigui atende cu nan. Ironicamente aña pasa tabatin e casonan di presonan cu a huy y consecuentemente a pone cu a haya fondonan adicional pa aumenta e siguridad. Lamentablemente tin biaha cosnan tin cu pasa pa e ora ey haya e atencion debido pa alocacion di fondonan y esey a tuma luga. E fondonan tabata di emergencia unda por a traha riba diferente proyecto cu sosten di Hulanda y asina a yuda entre otro pone prikkeldraad tur rond di KIA pa aumenta e siguridad.
Un otro bon noticia cu Minister Bikker a participa na staff y personal di KIA ta cu siman pasa riba su proposicion Conseho di Minister a bay di acuerdo cu lo tin 10 persona nobo cu lo sigui un curso pa bira aspirant cuidado di preso. Aruba ta hopi bendiciona cu por a aloca fondonan pa por haya 10 aspirant nobo pa KIA kendenan lo bay yuda alivia presion di trabou pa falta di trahado.
