Awe 12 september 2019 pa 4:00pm, ta un dia y ora importante y decisivo den bida di Kenny Montero, cu ta marca un comienso nobo! Awe oficialmente despues di un carera di 17 aña como Polis, awe e no ta forma parti mas ni di Cuerpo Policial, ni Bureau City Inspector, ni tampoco di Partido POR! Un decision cu no tabata facil tuma, pero si necesario, pa su bienestar emocional y fisico!
Manera tur hende sa, Aruba tin un problema grandi di maltrato di animal y animalnan riba caya! E ta un amante ferviente di animal y naturalesa y pa varios aña caba, e ta vocifera y bringa pa atencion y proteccion di animalnan y tambe naturalesa.
Montero ta considera cu na Aruba animalnan no tabatin prioridad (y te ainda no tin) pa wordo proteha! Y abuso di animal na Aruba y animalnan den situacionnan prenoso a cuminsa duna Aruba mal nomber den exterior y ya Ley di Cacho tabata existi caba!
“Mi a dicidi e tempo ey, cuminsa atende casonan di maltrato di animal den e districto cu mi tabata traha aden, paso mi hefenan no tabata permitimi atende casonan di otro districto. Despues di wak e esfuerso cu mi tabata haci y toch e bunita imagen cu e tabata duna e cuerpo, mi a wordo yama pa miembronan di leiding e tempo ey y nan a puntrami, kico korps lo por haci pa asina e trabou por bai mas eficaz! Mi a splica e tempo ey cu un team di 5 polis, lo nos por tackle e problematica di maltrato di bestia, basta bon. Nan a bisami e tempo ey, cu nan ta bai traha riba e posibilidad ey y lo lagami sa, te dia di awe”, asina Kenny Montero a conta.
Ora cu temporada di eleccion a yega, Partido POR a acerk’e y mirando cu den gobierno hopi mas lo por wordo haci, cual legislacion y material, el a dicidi di purba y a kies e partido POR, pasobra a pensa cu ta un partido nobo y cu sigur lo duna balor na ideanan nobo!
“Eleccion a pasa y mirando cu toch mi a logra di ta e di 8 cu mas voto riba e lista, mi a wordo acerca pa e liderasgo di partido y puntra kico nos lo por haci y mi a bolbe splica cu un team di 5 Polis, nos lo por handle e casonan di maltrato bon y tambe programanan di informacion na scolnan basico, pa enculca e amor pa animalnan cerca e muchanan! Nan a splicami cu lo zorg pa e team ey bin, pero lo kier pa e team atende otro asuntonan tambe, entre otro saco di sushi den supermarket y restaurantnan y tambe lagamento di awa di beerput bai riba caminda publico y cu lo zorg pa Buro City Inspector nami un man, cu mi a haya un tremendo idea e tempo ey”, segun Kenny Montero.
Dia 28 di februari 2018 mainta a yam’e pa presenta na Bestuurskantoor. Pa su sorpresa tabata pa un rueda di prensa, pa anuncia cu a lanta un Task Force den Bureau City Inspector, cu e lo forma parti di dje, hunto cu 1 miembro di Bureau City inspector (Un bon trahado) y un dama nombra pa e Minister. E problema tabata cu ningun di dos no tin autoridad pa atende cu casonan a base di Ley Di Cacho, ni casonan di saco di plastic y awa di beerput a base di e Algemene Politie Verordening!
“For di e prome dia na Bureau City Inspector, mi a cuminsa haya tegenwerking, pasobra mayoria City Inspector a laga sa cu nan no lo atende casonan di animal, paso esaki no ta den nan Taak Omschrijving! Kiermen ta ami so atrobe tabatin di atende tur casonan di animal. Asina mes sin material, ni auto pa traha e prome 8 lunanan, pasobra mi mester a depende riba e otro 2 grupo di City Inspectornan, 1 grupo cu tabata prestami auto dialuna y e otro diaransonnan, pero esaki ora nan no tabatin nada pa haci y mi tabata haya e auto fia pa mitar dia! Mi tabata haci mi best, pa purba atende tur caso, pero manera boso sa, riba un isla cu mas di 40.000 cacho (of mas), un persona no ta suficiente pa handle cu tur caso y esaki a cuminsa afecta mi emocionalmente (pa e feeling di impotencia/depresion, cu bo ta bisa e mandatario, kico tur por wordo haci pa remedia e problematica, pero bo opinion no ta wordo scucha) y tambe door di e mesun stress a cuminsa afecta mi salud fisico tambe”.
Mas laaf, segun Montero, ta cu Cuerpo Policial, cual Ley di Cacho ta cay bou di nan responsabilidad, tur yamada cu tabata drenta cercanan, tabata bisanan cu nan no por yuda y cu nan mester tuma contacto cune.
Dia 1 di juli 2019, Minister Presidente a lanta un comision pa atende asuntonan di cacho. E comite a bay prensa y anuncia cu e Dog Act ta un hecho y cu e “kill cage” a wordo elimina, cu un team di “Dog Catchers” lo ta cla pa subi caya pa duma boet, siendo cu esakinan no tabata cuadra cu e realidad! E realidad cu e “Kill Cage” no a wordo elimina y cu tampoco dicho team ta existi! E comite e tempo ey ainda tabata sondiando, pa wak ken nan tur lo forma parti di dicho team, tabata papia di 2 team di 3, cada team forma door di 1 City Inspectors (sin bevoegdheid), 1 agente policial (cu bevoegdheid) Cuerpo y tambe 1 miembro di Bureau Gele Koorts en muskieten bestrijding!
Durante reunionnan di e comite cu Cuerpo Policial y Bureau City Inspector, Cuerpo Policial a laga sa bon cla, cu nan lo fia 2 agente policial pa un periodo di 6 luna so y that is it! Esaki ta nifica cu despues di e 6 lunanan ey, atrobe animalnan no lo tin proteccion, pasobra atrobe e team ta consisti di personanan sin autoridad pa actua so!
“Esaki tabata e lasto druppel den e hemchi, cu a ponemi dicidi di entrega mi carta di retiro di 15 di juli 2019, pasobra mi ta para firme pa derecho di animalnan y mi no kier forma parti di organisacionnan cu no tin compasion ni amor pa animalnan! Tin un dicho ta bisa para firme pa loke ta husto, aunke esaki kiermen cu e chens ta cu bo lo ta para bo so y esey mi a haci”.
Manera por sigui e casonan di animalnan cu el a rescata for di situacionnan penoso y cachonan maltrata severamente, ta cu cen di su saco y of cu ayudo di fundacionnan entre otro Luna Foundation, Nine Lives Aruba, Animal Rights Aruba, Animal Relief Foundation Aruba, New Life For Paws, Sgt. Pepper’s Friends, Crijojo Trappers, nan a wordo realisa! Sin ayuda di gobierno. Si no ta pa e NGO’s, animalnan na Aruba no tin proteccion, jammer pa bisa esey!
“Na 2017 mi a saca mas o menos afl.17.000, na 2018 mas o menos afl.15.000 y na 2019 mas o menos afl.7000 pa yuda/salba animalnan! Tin luna cu mi mes tabata cay short cu mi compromisonan! Mi no ta regret di a saca e placa ey, paso no tin un satisfaccion mas grandi, wak e cara di gratitud, riba un cacho cu tabata penando wordo salba/cura y mi sa cu e Ser Supremo di un of otro manera lo sa di recompensami. Pero mi no por sigui carga e Karma mas pa Aruba, ni maske cuanto mi kier y sigur sin ayudo di gobierno no. Pesey mi kier yama un danki na tur amantenan di animal, pa e support cu mi a ricibi di bosonan y tambe suplica boso pa si proximo eleccion, un persona dicidi di postula su mes pa proteccion di animalnan, boso dun’e boso sosten masal”.
Pasobra si laga decisionnan encuanto proteccion di animalnan den man di gobernantenan cu no tin amor of compasion pa animal of no ta waknan como prioridad, Animalnan lo sigui pena y nos mes, amantenan di animal, lo sigui sufri den e impotencia di no por haci nada encuanto! Tin lo bisa “pero ta e doñonan mester ta responsabel pa nan animalnan y no Gobierno”. Esey ta cuadra, pero si e problematica a bira asina for di man cu e pais su reputacion den exterior cuminsa wordo atacha pa e maltratonan y animalnan di caya, e ora ta un problema nacional y cu pais Aruba mester atende!
“Mester bin un ley protegiendo tur animal, no cacho so, pasobra no ta cacho so ta wordo maltrata na Aruba! Mi persona lo no bandona e arena di defensa di animalnan, mi lo ta haciendo trabounan boluntario cu en especial e fundacion Luna! Toch mi ta desea e partido POR, KPA y gobierno tur clase di exito den futuro! Cu esaki mi ta cera e capitulo aki di mi bida y mi lo ta cla pa habri un capitulo nobo yen di entusiasmo. Spera cu pronto, cu e dicha y boluntad di e Ser Supremo trahando pa un compania of negoshi cu si lo sa balora y aprecia mi esfuerzonan”, asina Kenny Montero a finalisa bisando.
