E hoben presidente di Asamblea Nacional di Venezuela, Juan Guaido, a pidi diabierna apoyo di ciudadanonan di su pais, militar y comunidad internacional pa asumi mando di Presidencia. Guaido, di 35 aña y kende ta ocupa e presidencia di AN, como diputado pa e partido Voluntad Popular, a señala riba su cuenta di Twitter, cu basa den e articulo 333, e lo lucha “pa restitucion di orden constitucional” di su pais.
“Pa converti esaki den realidad, nos mester di e sumatorio di e forsa nacional y internacional pa por logra su plena aplicacion,” e funcionario a indica. E titular di Asamblea Nacional a mustra dispuesto na asumi e presidencia di Venezuela, na momento cu el a acusa e mandatario Nicolas Maduro di “usurpador”.
E lider Venezolano tambe a señala riba su rednan social cu e ta convoca “e pueblo di Venezuela, FAN y e comunidad internacional pa logra e conformacion efectivo di e gobierno den transicion.”
Guaido a bisa den e audiencia publico cu e Camara lo apega na e constitucion Venezolano y, den e sentido aki, lo asumi “e competencianan di e encargaduria di un Presidencia di Republica,” no sin adverti cu e mero decreto no lo ta suficiente pa saca Maduro for di e poder, kende a hura diahuebs como Hefe di Estado te cu 2025.
“Nos ta asumi e ora e convocatorio na e Forsanan Arma, na e comunidad internacional, na e ehercisio di e articulonan di nos constitucion 333, 350 y 233 pa eherce mandato,” e opositor a prosegui sin nunca bisa expresamente cu e ta asumi e cargo di presidente di e Republica, como algun sector antichavismo ta pidi.
Memey di su intervencion, e presidente di e Asamblea Nacional a haci yamadonan reitersa na e Forsanan Arma Nacional Bolivariano (FANB) pa nan respalda e accionnan di e Camara, un organo declara den ireferencia of inrespeta, pa e Supremo na 2016, poco siman despues cu e oposicion a gana mayoria di e votonan.
Na e famia militar cu kier cambio, cu kier mescos cu nos, nos ta haci un yamado di nogo, aki boso ta haya e Asamblea Nacional legitimo cu claro cu ta asumi su responsabilidad y lo bay asumi’e,” e institucion Castrense a bisa.
Guaido ta ingeniero industrial di e Universidad Catolico Andres Bello di Venezuela. Su prome cargo publico el a asumi’e na 2011 ora cu el a ocupa un asiento den e Asamblea Nacional pa Volutad Popular, haciendo parti di e Mesa di Unidad Democratico (MUD).
Na 2016 e lider Venezolano a wordo reeligi como diputado di e Asamblea Nacional, kende posteriormente a wordo declara como irespeta. Pero, desde Januari di 2018, Guaido a encabesa e fraccion di e mayoria, un division dentro di MUD.
E presidente di e Asamblea Nacional, kende ta denomina riba su cuenta di Twitter, como “un sirbidor publico namora di Venezuela”, a convoca un gran mobilisacion dia 23 di Januari, fecha unda cu ta conmemora e caida di e dictadura di Marcos Perez Jimenez.
