Kawish Misier: Si comercio stop di paga BBO gobierno ta cay den otro

Diahuebs anochi Camara di Comercio a tene su Townhall Meeting, cu tabata full house. E topico tabata Reforma Fiscal.

Segun presidente di Camara di Comercio, Kawish Misier, pa nuebe luna largo a puntra gobierno kico ta bin den fase 2 di e reforma fiscal y te siman pasa, den e stakeholder session, nan a presenta algun punto cu a inclui pa paga BBO na frontera, pa bin cu un Sugar Tax y pa bin cu un Witholding tax, riba management fees, royalties y rente. Siman pasa a duna KvK 10 minuut pa nan vocifera nan opinion.

A bisa cu e ta mucho tiki, pasobra un reforma fiscal ta masha importante y hopi grandi. E ta conta pa e siguiente 20 pa 30 aña. Y a puntra nan pa nan duna sikiera un siman pa por prepara nan conseho.

Awo e siman aki, e comision di impuesto a sinta cu otro. A delibera, a bin cu un Townhall Meeting full house. E comerciantenan a papia hopi cla y duna nan mensahe.

Como presidente di Camara di comercio, ta representa comercio, negoshinan chikito, mediano y grandi. Y tur cu tabata presente unanimamente a bisa cu prome cu bin un impuesto nobo, gobierno tin cu baha gasto. Ta basta.

Nan ta matando e baca cu ta duna lechi. Nan ta matando e galiña cu ta pone e webo di oro,. Nos turismo ta asina importante y nos turistanan ta keha cu Aruba ta caro. Nos negoshinan ta cera y a haci encuesta y e motibo number uno cu negoshinan ta cera, ta e costo halto di haci negoshi.

Mester ta hopi conciente pa e economia aki pa no bin cu mas medida, pa no mester sconde e BBO y kita Sugar Tax for di mesa.

Misier no kier discuti riba Sugar Tax pasobra e no ta saludabel pa e pais aki, e no ta saludabel financieramente. Gobierno tin cu scucha y a bin bon sugerencia con pa baha gasto, con por bin cu ideanan out of the box. Comerciantenan a expresa hopi cla, cu mester cuminsa maneha e gobierno como un negoshi. 

Y prome cu e negoshi ta wak con pa aumenta nan entrada, nan ta baha nan gasto. Esey ta e golden word “Bezuiniging”. Si ta papia di medida, unico medida cu ta papia di dje, ta cu gobierno tin cu baha nan gasto y si nan no haci esey, e ora ey comerciantenan mes lo por bin cu medida. E sugerencia cu a bin for di sala ta, cu tur comerciante, pa dos luna, tin cu stop di paga BBO y mesora gobierno lo sinta na mesa y scucha nan.

Dos luna sin paga belasting, gobierno ta cay den otro. Nan tin cu scucha esunnan cu ta paga gobierno. Comercio ta e weso di lomba di e pais aki y na no por bin cu mas medida sin scucha nan, Misier a comenta.