Kaso di tiramentu ku morto

Djasabra mardugá 22 di sèptèmber 2018, alrededor di 02.50’or, Sentral di Polis a dirigí unidatnan polisial na Cubaweg na altura di un establesimentu di dibertishon pa un kaso di tiramentu ku a tuma lugá.

For di un investigashon preliminar ku polis a realisá na e sitio, a resultá ku un hòmber pa un òf otro motibu lo a keda tira dor di un òf mas persona riba Cubaweg, probablemente algu mas despues di e establesimentu en kestion.
Despues e víktima lo a kore bin kai patras di su vehíkulo ku tabata stashoná riba e lugá di stashoná outo di e establesimentu.
Tantu riba kaya kaminda e tiramentu lo a kuminsá komo riba e lugá di stashoná outo, a bin topa ku un kantidat di kashinan di bala.
Diferente outo ku tabata stashoná dilanti di e sentro di dibertishon aki a risibí perforashon di bala.
Ambulans ku a yega na e sitio no por a hasi nada mas pa e víktima.
Dòkter di polis alrededor di 04.45’or a konstatá morto di e hòmber Jeandre Cristefer Jansen nase na Kòrsou di 27 aña di edat.
Nos ta supliká kualke persona ku ta disponé di informashon ku por yuda den solushon di e kaso aki pa duna polis e informashon aki na telefòn 917(24 ora pa dia) òf 108(number anónimo, kaminda bo anonimidat ta garantisá)

Detenshon di ilegal i konfiskashon di droga
Kontinuando ku e investigashon den e kaso di tiramentu na e sitio, ku intervenshon di e propietario, polis a bai den e establesimentu ariba menshoná, ku ya tabata kompletamente será.
Einan polis a bin topa mas di 15 persona ku tabata sinta den skuridat.
Den e 15 personanan ei tabatin 9 dama (“trago meisjes”) ku a keda detené i entrega na departamento di Imigrashon.
Mesora polis a hasi un entrada hudisial na e establesimentu, unda a konfiská e atministrashon pa mas investigashon.
Tambe a detené un bewaker ku tabata den posishon di un kantidat grandi di kokaina, probablemente pa benta.
Investigashon den e posibel kaso di trafikashon/kontrabanda di hende lo kontinuá.