Djárason 29 di mei 2019, alrededor di 21.20’or, Sentral di polis a risibí informashon ku tabatin un kaso di tiramentu na altura di un toko den Kaya Antonia F.M. Newton-Corthals i kaminda un hòmber lo tabata seriamente heridá.
E promé unidat polisial ku a yega na e sitio, a bin topa un hòmber drumi abou ku algun herida di bala na altura di su kabes, pechu i brasa i no tabata duna señal di bida. A pidi presensia di ambulans, pero na nan yegada, e personal aki no por a hasi nada mas pa e víktima.
Dòkter di polis ku a presentá na e sitio, a konstatá morto di e hòmber Kendrick Misael Sophia, nase na Kòrsou dia 30 di mart 1991. For di investigashon preliminar a sali na kla ku e víktima tabata pará huntu ku algun persona na altura di e toko, na momentu ku dos hòmber a yega ku armanan outomátiko i los algun tiru dirigí riba e víktima. Despues di nan akto, e dos sospechosonan a bandoná e sitio na pia. Riba òrdu di fiskal di Ministerio Públiko a konfiská e kurpa sin bida pa mas investigashon. Investigashon den e kaso aki ta kontinuá.
