Djasabra 6 di aprel 2019, alrededor di 08.37 or di mainta, Sentral di Polis a dirigí un unidat polisial na Kaya Yerba Bueno pa un kaso di tiramentu ku herido. Na yegada di e unidat, nan no a topa ku e víktima.
Polis a komprondé di testigunan ku e víktima tabata den diskushon ku un hòmber. Diripiente e sospechoso a saka un arma di kandela i a lòs tiru ku a heridá e víktima na su brasa. Despues di e akto e sospechoso a drenta un vèn blanku i bandona e sitio.
Personanan na e sitio a hiba e víktima pa un Sentro Médiko den e área pa despues ambulans transporté pa poliklínika di SEHOS pa mas tratamentu. Alrededor di 11.50 or, a lokalisá e vèn blanku pará riba kaminda di bai Fuik. Departamentu di Reshèrshi ta investigando e kaso aki.
