Djasabra 22 di yüni 2019 alrededor di 00.43or, Sentral di Polis a risibí un yamada tokante di un vehíkulo ku a aksidentá kontra di muraya di un panaderia na Rooi Santu i despues di esei e persona tende algun tiru. Na yegada di e promé unidat polisial ku a yega na e sitio, el a bin topa ku un hòmber ku a aksidentá ku su outo kontra di muraya di e panaderia.
E shofùr aki tabatin algun herida di bala na altura di su kabes i kurpa. Ambulans ku a presentá na e sitio, a transportá e víktima den situashon krítiko pa poliklínika di SEHOS. Alrededor di 07.30or di mainta e víktima a fayesé.
Ta trata di e hòmber Idrick Sebastian Francisca, nasé na Kòrsou dia 20 di yanüari 1995. Riba òrdu di fiskal di Ministerio Públiko a konfiská e kurpa sin bida pa mas investigashon. Investigashon den e kaso aki ta kontinuá.
