Kartista Mathew Paesch preparando pa Rok Cup Panamericano

E hoben Arubiano Mathew Paesch ta participando den caredanan di Go-Kart riba e pista di Juan Pablo Montoya Kartodromo, na Tocancipá, Cundinamarca, Colombia.

Organisacion di e caredanan di Rok Cup Colombia ta den man di e experto Andre Coral. E caredanan aki ta tuma luga un biaha pa luna y ta atrae masha hopi hende, pero tambe Pilotonan activo. E categorianan ta varia for di baby (4 aña) te cu master, inclusive elite cu ta hopi popular tambe.

Nan a cuminsa cu e categoria baby y awendia tin 15 mucha participando den esaki.

E ta un competencia local, pero nan a bin ta hayando participantenan for di Aruba tambe. Den e Rok Cup Panamericano di aña pasa a cera conoci cu un delegacion di Aruba, den cual tabatin excelente Pilotonan di Aruba. Tin tres Piloto di Aruba cu a bin ta coriendo den Rok Cup Colombia y coy mas experiencia di e forma aki. E caredanan ta forma parti di preparacion tambe pa e Rok Cup Panamericano cu ta tuma luga den luna di juli na Ecuador. Mathew ta na Colombia awo preparando pa compaña e grupo na Ecuador.

Pa un Piloto por progresa ta importante tin un pista cu ta cumpli cu rekisitonan di Go-Kart.

Mathew Paesch ta preparando su mes tambe pa e competencia di Rok Cup Panamericano na Ecuador, unda Pilotonan internacional ta participando.