Na momento cu Mathew Paesch a core riba pista di Juan Pablo Montoya Kartodromo, na Tocancipá, Cundinamarca, Colombia, el a haci esaki den presencia di diferente Arubiano, incluyendo su mama Lienchi Merryweather.
Paesch a biaha pa Colombia pa participa den Rok Cup Colombia, cu ta tuma luga un biaha pa luna. E biaha’ki no solamente famia tabata presente, pero tambe Miriam Dabian, Director di Mercadeo di Oficina di Turismo di Aruba pa Latino America. “Si un Arubiano ta defende e bandera di Aruba, nos t’ey,” el a bisa.
Kartista Mathew Paesch a kibra record di pista na Colombia
Kartista Mathew Paesch a kibra record di pista na Colombia. Click aki pa mas https://24ora.tv/2XA8Rev
Posted by 24ora on Sunday, June 9, 2019
Cada bes cu un Arubiano participa den un evento internacional, e bandera lo bula y esaki ta un promocion grandi pa nos isla, Dabian a bisa. Y mas den e caso aki na momento cu Mathew Paesch a logra kibra record di e pista den un di e caredanan, cu no tabata ni e final mes. “Nos a mira un bunita careda, unda e hoben aki a sa di defende su careda y a haci un spin masha bunita pa lidera e careda. Bo ta sinti un emocion y mas orguyo Arubiano ta sinti ora cu a menciona cu el a kibra un record.”
Lienchi Merryweather ta sinti un orguyo grandi cu e logro di su yiu, kende a cuminsa cu su carera for di su tres aña. Tabatin varios Arubiano presente pa apoy’e y ora cu el a kibra e record di e pista, e tabata un emocion grandi.
Pero wowo internacional tambe ta riba Mathew Paesch. E ta algo cu Mathew a bin ta trahando riba dje for di inicio. E ta firma pa bay Panamericano cu e deseo di bay core na Italia. El a logra un contracto cu un team internacional di Ecuador, pa cual e contracto lo wordo seya diadomingo. Despues e ta biaha mesora, na final, pa Ecuador.
Gregory Tromp a compaña Mathew Paesch. Tromp, un ex coredo di Go-Kart, ta encarga cu e parti di logistico di participacion di Paesch den caredanan. E mester percura pa material di e vehiculo di e Piloto hasta te na un masahista cu baha e tension. E tin hopi confiansa den Mathew Paesch, pasobra e tin hopi tempo envolvi den e preparacion di e Piloto aki pa e yega na e punto grandi di participacion internacional. Y pronto como miembro di un team internacional. “E secreto di un bon team ta pa tur hende pone schouder hunto y cada ken haci nan trabou manera debe ser,” Tromp a bisa.
