Djadumingu 4 di febrüari nos muchanan a desfilá den nos kayanan den e marcha di karnaval hubenil 2018 i manera tur aña di nobo ta e kaso personal di Selikor a hasi e limpiesa despues. E aña akí e marcha di mucha a produsí 8.680 kilo di shushi.
Selikor pa añanan largu ta duna su kontribushon pa engrandesé nos Karnaval. E aña akí un bes mas e kompania a hasi trabounan di limpiesa riba ruta promé ku marcha i djadumingu ku a pasa a limpia henter e ruta ku marcha di mucha a kubri. Pa hasi e trabounan di limpiesa Selikor a uza diferente ekipo pisá. A hasi uso di 2 trùk di shushi, 3 mashin di bari i tambe un trailer trùk ku públiko mes por a yega serka i benta shushi aden. Tambe un tim di Selikor a pasa, promé ku e marcha, pa mara saku di shushi na e drangheknan pa públiko por a usa den kaso nan no a kòrda sali kas ku nan propio saku. A pega un total di 1.000 saku di shushi di 100 liter. A repartí e trabounan di limpiesa bou di 2 tim i kada tim tabata konsistí di mas o ménos 20 persona, bou di guia di un kordinadó.
E promé tim a start na komienso di e ruta na plaza Hariri i e di dos tim a start na altura di Hanch’i Polar. Tambe un tim di 6 persona a yuda Kuerpo Polisial sera/habri kaya. E trabounan di limpiesa a start mas o ménos un ora despues ku e último grupo di mucha a ranka sali. Esaki pa no konglomerá e tráfiko i pa duna e públiko kant’i kaminda tur espasio pa regresá kas, despues di e marcha, sin muchu molèster. Trabounan di limpiesa a kana te ku sigur mei anochi. E trabounan di limpiesa desplegá por ser katalogá komo trabounan grandi
ku ta eksigí bon preparashon i kordinashon i na final di e trabounan por konkluí ku e trabounan a kana bon i sin muchu insidente. Públiko a sòru di hasi uso optimal di e sakunan di shushi na e drangheknan. Tambe Selikor a risibí bon koperashon di Kuerpo Polisial pa e trabounan por a
kana bon. Pa e siguiente marchanan Selikor ta bolbe konta riba koperashon di komunidat den su totalidat pa nos kayanan por keda limpi atras.
