Durante un conferencia di prensa Instituto Biba Saludabel y Activo (IBiSA) a anuncia nan kalender di deporte escolar pa loke for di aworaki te cu luna di juni, ora cu aña escolar ta finalisa.
Edgar Erasmus, di Management Team, a habri e conferencia dunando un relato chikito di kico nan a logra toch, apesar di e pandemia di aña pasa. Aña pasa mester a pospone deporte escolar door di e pandemia. Asina mes a cuminsa cu deporte online, cual toch a haya su acogida. A logra haya cu 17 pa 18 scol a participa den 5 diferente categoria. Aworaki nan a logra finalisa un kalender di resto di aña escolar aki.
E idea, segun Erasmus, ta pa bini cu deportenan nobo pa motiva mas mucha y scol participa, y crea cerca nan e gana pa nan uni na un club deportivo.
Tambe a hiba palabra Kamilah Dammers-Naddall, Chef interino Deporte Escolar. E kalender deportivo, ta algo cu a conoce su di 7 version, pa motibo cu varios biaha mester a adapta esaki debi na e pandemia di coronavirus. Na final a logra hinca un kalender den otro den cual mayoria di e deportenan ta den aire liber.
Tambe a introduci un logo pa deporte escolar cu lo aparece riba tur nan medaya y trofeonan.
El a splica tambe cu a logra pone den e kalender 5 ramo deportivo pa scolnan basico y scolnan secundario. Den basico tin e ramonan di Badminton; natacion; atletismo; beach tennis y careda pa mucha. Pa esnan di scol secundario tin: Badminton; volleyball; cross fit; futbol y careda pa hobennan.
Lamentablemente, Dammers a bisa, no a logra yega na algun deporte pa e muchanan di kleuterschoolnan. Kisas algun di nan, debi na nan edad, por participa den e kidsrun. Pa otro aña lo tin un programa completo pa nan, unda ta enfoca mas riba participacion en bes di algo competitivo.
Mayornan cu ta interesa pa nan yiunan participa den un ramo deportivo, por tuma contacto cu gym leraar.
