Awe juffrouw Lacle – Mata, docente na Colegio San Antonio Mavo a celebra 35 aña den servicio di SKOA. Esaki ta nifica un bunita carera dedica na enseñansa catolico na Aruba.
Juffrouw Mariksa pa algun y pa nos na scol juffruw Lacle – Mata, a cuminsa su carera como docente na aña 1983 y na aña 1984 a drenta den “vaste dienst” na SKOA. E ta indica cu p’e enseñansa ta su vocacion, cu semper e kier a bira maestra di scol. Juffrouw Lacle-Mata a cuminsa como docente na Sint Fransiscus College y a traha tambe na Scol di Amor, Colegio San Hose, Mariaschool y desde 2010 na Colegio San Antonio na Sta. Cruz.
Banda di tur esaki nos hubilario a dedica hopi aña na duna les di confirmacion na hopi hoben na Aruba. Aki el a traha hopi di cerca cu zuster Juliette y zuster Lucy.
Ora nos puntra juffrouw Lacle – Mata kico e ta gusta di su trabou, e ta indica cu loke mas ta motiv’e ta yuda e alumno logra su potencial. E satisfaccion di mas grandi p’e ta ora un alumno bolbe bek despues y cont’e kico tur el a logra despues di caba scol.
Presente na e celebracion awe mainta tawata e famia mas cerca di e hubilario, su casa Roy y yiunan Marielle y Marlee como tambe hopi di su rumannan. Banda di director meneer Lee a hiba palabra zuster Lucy y juffrouw Nadine Kirindingo, un ex-alumno di juffrouw Mariksa cu actualmente ta cabesante na Sint Fransiscus College. Docentenan a lesa mensahe di Johaddis Jong y Maribel Andrade cu a expresa nan admiracion pa juffrouw Lacle – Mata y por ultimo Loui-Angelo a declama un bunita poesia pa e hubilario.
Como regalo di scol, juffrouw Lacle-Mata a ricibi un cuadra cu ta consisti di 19 cuadra chikito, un pa cada klas cu hubilario ta duna les.
Nos ta gradici juffrouw Lacle – Mata pa su dedicacion y amor pa enseñansa na nos scol. Como docente di KGL (godsdienst) pero tambe como counselor di scol, e tin un tarea hopi importante den e guia y educacion di nos alumnonan.
