E reunion publico cu e dos parlamentario di POR a pidi pa retira confiansa for di minister di infrastructura, a bay hopi largo. E Parlamentarionan aki mester a trece nan punto dilanti, pero no a haci esaki. E minister tabatin su oportunidad pa papia y a trece su puntonan dilanti unda a topa cu cierto actonan di corupcion den su departamentonan, di cual e tin documentonan.
Durante e di dos tanda, no a entrega ningun mocion. Mr. Juan Thijsen, presidente di Parlamento, a bisa cu mester a sigui cu e reunion pa hende entrega un mocion den e di dos tanda, pero esey no a pasa. Fraccion di MEP si a entrega un mocion di combati corupcion y tur fraccion a bay di acuerdo. Pa loke ta mocion di desconfiansa no a bin, pero e mandatario si a defende su mes.
E problema ta keda den partido POR y nan tin di mira con pa atende cu nan asunto. Gobernacion ta sigui, Parlamento tin di sigui cu nan trabou. Segun Thijsen, si tin cosnan no ta bay bon, nan lo yama cualkier minister pa responsabilisa su mes. Presidente di Parlamento a tuma e decision di laga minister Bikker papia, pasobra e mandatario kier a aclaria algun ya cu e reunion a cambia di dimension. Comunidad a sigui e reunion aki, segun Thijsen. Nan ta pidi pa transparencia y kier sa kico ta pasa. E ta bon pa tur hende sa kico ta pasa, p’esey como presidente di Parlamento, e ta carga tur responsabilidad.
Ta bay tuma luga e aña Parlamentario y lo mira cua ta e miho candidato. Segun Thijsen, den su carera politico e no tabata kier posicion, pero tabatin confiansa den dje pa tres aña y awo ta bay pa di cuater aña. Si tin confiansa den dje, nan lo eligie, pero si tin otro persona cu kier hacie y tin confiansa den dje, su persona lo duna sosten.
