E presidente encarga di Venezuela, Juan Guaido, compaña pa Leopoldo Lopez y integrantenan di e Forza Arma Nacional, a manda un mensahe na e Venezolanonan for di e base aerea di La Carlota.
Guaido a expresa cu e “momento ta awo” pa recupera e democracia na Venezuela. El a haci un yamado na e empleadonan publico y militar pa compaña nan den e lucha: “Dia prome di Mei a cuminsa awe… Nos ta conta cu e pueblo di Venezuela.”
El a expresa cu e ta apega na e Constitucion y cu FAC ta na banda di pueblo.
For di varios periodista di e pais, entre nan e periodista Alberto Ravell, a menciona cu tin movimientonan iregular di militar contra di e usurpacion.
Di su parti, e diputado Gaby Arellano, a asevera cu diamars 30 di April, esta awe, a “cuminsa e Operacion Libertad”.
Nos lo keda pendiente di e desaroyonan cu tin ta andando na Venezuela.
Libertad di Leopoldo Lopez
Ya for di un tempo caba, Leopoldo Lopez, exalcalde di Caracas, tabata bao di aresto domiciliario. El a wordo acusa den pasado pa Nicolas Maduro, pa ta responsabel pa e mortonan di e prome demostracion cu a tuma luga na Caracas.
El a wordo aresta, encarcela, te cu el a logra sali for di basta tempo, pa su cas caminda cu el a keda bao di e aresto.
Diamars mainta, el a wordo libera for di su aresto domicilario pa militarnan desertor di e regimen di Maduro.