Den IPKO a trata tambe e Relacion di Reino, cual ta un topico sigur di hopi relevancia. E discusion aki ta uno cu ta bin dilanti hopi biaha.
Jourien Woute di D66 a bisa cu esaki ta un topico cu tin di haber cu e confiansa mutuo, e tin di haber tambe di e mehoracion di e relacionnan, cu e reforsamento di e cooperacion mutuo, cual ta algo cu D66 ta para p’e. Den Eerste Kamer, Woute a trece dilanti e preocupacion di e Parlamento di Aruba pa loke ta reenforsa e reformanan fiscal y a indica cu si kier haci esaki en conhunto como Reino, bo mester tin un bon dosis di curiosidad. Esaki ta e meta di e Interparlementaire Koninkrijksoverleg (IPKO).
Pa tin curiosidad na e cultura politico na Aruba, Corsou, St. Maarten y tambe na Hulanda, pero tambe na cultura administrativo, e cultura parlamentario. Cu cual actividad parlamentario Hulanda ta bezig cu ne, pero tambe Aruba.
Den e caso aki, Woute ta curioso na e agenda di reformanan cu Aruba, Corsou y St. Maarten, a cuminsa cu ne, parcialmente door di e pandemia di Coronavirus, mas cu claro riba presion di Hulanda. Tambe e kier mas informacion riba e rol di parlamento den e reformanan aki. Si parlamento tin un agenda di maneho, unda cu ta pidi atencion na e desaroyo socio-economico y cual ta e impacto tin riba e balor agrega y si esaki ta trece mehoracion pa e poblacion. E ta un pregunta door di curiosidad cu tin su origen basa riba e echo cu, su persona hunto cu su partido D66, ta haya cu ta hopi importante pa hunto duna contenido na e agenda di Reino, pa hunto determina e prioridadnan.
Segun Woute, e no por bisa si Aruba ta haci su best pa cumpli cu e reformanan aki. Esaki tabata e base di su pregunta, unda cu el a trece dilanti cu e no tin un bista mucho cla di kico ta e agenda politico di parlamento y con nan ta completa esaki, pa asina na Hulanda tambe nan sa y pa acopla na esaki. No mester lubida cu ta den Tweede Kamer na Hulanda ta defini e Rijkswetnan. Relaciona cu esaki, conocemento di e actividadnan di e parlamentarionan di Aruba, Corsou y St. Maarten ta hopi importante pa nan, pa asina nan tambe por duna contenido na nan mesun agenda politico.
CHARLA ‘ONGEMAK’
Diamars tambe a tuma luga un charla relaciona cu e buki ‘Ongemak’ skirbi door di dos profesor di Universiteit di Leiden y riba esaki Woute a bisa cu e falta di deficit di democracia tin su origen for di 1954, cual ta conoci. E tin di haber cu e sentimento y e ehecucion efectivo cu ta duna na e representacion, unda cu e proceso di decolonisacion ta base di Statuut. Pa Woute e charla aki tabata un interesante ya cu e ta keda un topico actual. Ta importante pa pone esaki den e agenda politico, si e ta den e acuerdo di gobernacion. Ta bon pa scucha con Aruba of e otro islanan ta wak e proceso aki, colonisacion y decolonisacion di e islanan. No por trata esaki den isolacion, pero semper mester trata esaki den un reunion hunto cu e otro representantenan di e islanan.
E pueblo Hulandes mester realisa cu Reino Hulandes ta consisti di no solamente Hulanda, pero tambe di tres otro partnernan mas, den Caribe, cu ta e representante di e pueblonan den Caribe. E ta un topico cu sigur den e ultimo aña tabata mas den background, pero Woute ta haya cu ta importante pa discuti esaki conhuntamente y si no por hacie hunto, pa wak con ta determina e posicion politico y ideologico di cada un di e partidonan envolvi.
Paul Comenencia, miembro di Raad van State pa Corsou a trece dilanti cu e islanan mester haci nan maximo esfuerso pa por representa na pais miho den e Relacion cu Reino, unda cu ta nombra ‘friends and family’ pa cierto posicionnan importante, te na rand di nepotismo. Riba esaki, Woute a trece dilanti cu el a biba pa hopi aña na St. Maarten y e ta na altura cu e vulnerabilidadnan aki berdaderamente ta existi y ta relaciona cu cierto caracteristicanan den un comunidad chikito. Dimes cu lo kier un bon posicion, un bon gobernacion, un bon maneho financiero y otro temanan cu ta relaciona c’un bon desaroyo socio-economico, relaciona cu e tratadonan internacional y e derechonan humano, pa esaki lo kier tin un bon representante.
Ta importante pa tin un bon representante den parlamento di Caribe. Semper zorg pa tin un bon comunicacion, den e sistema Hulandes, sigur via e diferente Gabinetenan di Minister Plenipotenciario. Reuni riba un base regular pa asina comparti idea y visionnan cu por yuda na mehora e relacionnan entre e islanan cu Hulanda.
KEN TA JORIEN WUITE
Wuite a nace na Den Haag y a crece den e area aki. Ambos mayor a traha den e ramo di educacion y su mama, Anna Merab Richardson, escritor tambe, ta di St. Maarten. El a studia Gezondheidswetenschappen na Erasmus Universiteit Rotterdam. Despues el a haci un di dos master den Public Managemente & Policy na Open Universiteit y a studia Politica Internacional na Instituut Clingandeal.
Na 1997 el a bay biba na St. Maarten unda cu el a bira director di e Sector di Cuido na St. Maarten. Na 2008 el a bira director di Sector di Cuido, Desaroyo Social y Labor na 2008 y a keda den e funcion ey te na su nombracion como Secretario General di e Ministerio ey dos aña despues. Na 2014 el a bira politicamente activo na St. Maarten. Na 2018 el a bira Minister Plenipotenciario di St. Maarten pa cual el a bandona St. Maarten y a bay biba bek na Den Haag. Na 2020 el a bira miembro di D66 y a pone su mes eligibel pa e eleccion di Tweede Kamer na 2021. Dia 31 di maart 2021 el a huramenta como e prome miembro di Tweede Kamer c’un background di St. Maarten. E ta miembro di e comision interparlamentario relaciona cu e Nederlandse Taalunie y e comision fiho pa Buitenlandse Handel en Ontwikkelingssamenwerking (presidente), pa Relacion di Exterior, pa Relacion di Reino y pa Educacion, Cultura y Ciencia.
