Sindicato cu ta representa maestro y docentenan no ta compronde e maneho di gobierno pa loke ta infrastructura. Tin suficiente edificio, pero ta scucha cu asina mes ta buscando otro edificionan pa huur.
E ta un preocupacion cu a yega na horea di SIMAR. Tin varios scol bandona manera Reina Beatrix y Juliana School, cu no tin trabou andando eynan pa hopi aña caba. Na mesun momento ta scucha cu ta busca edificio pa huur for di of pa un scol di exterior. Esaki na momento cu tin scolnan hinca den edificionan cu tin su limitacionnan, manera a keda demostra den e pandemia aki.
Lo ta na su luga, e presidente di SIMAR Josephine Albertus a bisa, ta pa aloca e fondonan necesario pa drecha e scolnan aki cu e mucha y hobennan tin un luga adecuado pa haya les. Y no manera ta e situacion aworaki cu nan ta hinca manera den poco lokaal cu no ta adecuado, pasobra no tabata construi pa ta un scol. Na edificio di VAD ta huur e espacio pa e muchanan di scol basico, cu no ta brinda nada di calidad.
Ta hopi pregunta cu SIMAR tin. E tin nan preocupacion pasobra e tipo di localidadnan cu ta uza awo ta di emergencia, y no ta brinda e posibilidadnan pa duna un enseñansa di calidad cu e studiantenan di Aruba merece. Awo no tin trankilidad, pero preocupacion so.
