Den medionan Hulanda a sali publico cu tabatin un tiroteo den Jacob van Heemskerckstraat na Dordrecht diasabra anochi cu a laga saldo di un morto. E victima ta Johnny Henriques, segun amigonan na e sitio a confirma.
Esey no tabata unico incidente pasobra casi un ora despues tabatin otro tiramento den e mesun area, pero e victima a wordo alcansa na su pia y ta for di peligro.
Johnny Henriques
Johnny Henriques a wordo tira net un poco prome cu mey anochi, ora di Hulanda. Net cinco minuut prome cu mey anochi Polis a haya e melding di personanan den vecindario cu nan a scucha varios tiro. Tin hende ta bisa di a scucha 5 pa 6 tiro. Polisnan cu a yega na e sitio a topa cu Johnny Henriques riba caya seriamente herida. Pero no por a haci nada mas pe, ya cu el a fayece na e sitio mes. Esun responsabel a huy y apesar cu a haci uzo di helicopter, no a logra topa cu eusn responsabel.
E di dos tiramento a sosode pa 1.10 di marduga den Dordrecht tambe. E Polisnan a topa e homber tira na pia pero e no tabata den estado di peligro.
Polisnan no a saca afo ainda si e dos casonan aki tin di haber cu otro. E tiramentonan tabata na 1.5 kilometer di otro. Na famianan ta bay palabra di condolencia.
