John Henriquez ta di e departamento di malesanan contagioso. El a splica di ta contento di mira partnernan sinta hunto pa loke ta e temporada di carnaval.
El a splica durante entrevista lo bay topa cu un temporada basta grandi y largo di actividad. Lo bay tin hopi alcohol, hopi uso di droga, cu consecuentemente muchanan lo bay haci cosnan sin pensa. Hendenan di edad tambe lo haci esaki. Den e parti aki lo bay haya cu ta bay tin relacion sexual y eynan nan no ta bay haci uso di proteccion hopi biaha.
Cu e consecuencia cu algun siman despues, depende di cua actividad, ta bay haya cu e muchanan ta bay bira nervioso, of kisas un hende grandi mes, pasobra nan tabata burachi, nan tabata cu un persona. Nan a tene relacion sexual y nan ta bay sinti algun sintoma. E ora ey bo ta bay haya cu algun di nan ta bay end up na Departamento di Malesanan Contagioso, pa asina nan haci un test riba malesanan transmiti sexualmente.
E ora eynan ta haci e test pa asina bay wak si nan tin un malesa. Esey ta parti di e departamento.
Apart di esey tambe, e departamento ta duna hopi informacion tocante malesanan transmiti sexualmente. Ta bay tin un programa hunto cu FADA, cual lo bay wordo menciona despues. Ta duna charla na scol, como tambe na empresanan priva of cualkier luga cu tin necesidad di haya informacion over di e malesanan transmiti sexualmente, ta haci esey pa nan.
Mirando cu e temorada ta largo, lo bay haya e hendenan ta acerca nan. Hopi biaha e no ta directamente despues di e temporada. Pero por pasa algun siman despues di e temporada di carnaval, cu e personanan ta bay cuminsa haya e sintomanan.
Esey ta haci e ora cu ta bay haya despues di e temporada di carnaval, toch e personanan ta keda yega cerca e departamento pa haci un test riba e malesanan transmiti sexualmente.
Mensahe cu e departamento ta trece p’adilanti ta cu mester ta conciente cu na momento cu haci un escogencia, percura pa bo escogencia ta positivo, percura pa haci uso di proteccion, na momento cu bay tene relacion sexual. Pero sa cu durante e temporada di carnaval, bo ta haya hendenan cu ta bay tuma un decision inconciente. Hopi biaha nan no tin proteccion cu nan na e momento ey. Eynan ta e momento cu cosnan por bay robes.
Esey no ta cu hobennan so, sino tambe adultonan tambe. Hopi biaha tin gruponan ta enfoca riba hoben, pero toch ta haya adultonan tambe ta bay na e departamento pa haci e testnan aki, Henriquez a finalisa.
