“Despues di un periodo di mas o menos 1 aña di forma parti di D’-Licious ayera 15 di februari 2019, mi a tuma e desicion personal pa no sigui forma parti mas di e banda. Di aki mi kier a gradici na friends y coleganan musico pa tur cos y danki pa e 2 añanan di Tumba cu tabata hot. Mi ta desea DLS tur clase di exito. Na mi fanaticonan, danki pa kere den mi y keda pendiente pasobra tin hopi mas di Jerwin”, asina e cantante Jerwin Hernandez a anuncia un rato pasa riba su pagina di Facebook.
E anuncio aki ta bin memey di un lista di otro cambionan tumando luga entre bandanan musical y di polemicanan cu sea banda pf cantante. Ta net prome cu fin di siman cu Mervin “Blacky” Baptiste tambe a anuncia su salida di Tsunami. E lo ta un cantante liber pa awo y den e dianan cu ta resta di carnaval e lo integra den Le Groove.
Jerwin Hernandez no kier a bay den detaye pero parce cu den fin di aña el a haya problema cu e banda. Kico exactamente, e no kier bisa. El a laga sa si di lo dedica su tempo awo na e Festival di Himno y Bandera y despues kier dedica un poco mas tempo na su estudio. E no ta descarta cu lo tin sorpresa musical den e lunanan nos dilanti.
