Diabierna mainta Corte a trata e caso sumario cu Drs. Jerry Staring, Director di Departamento di Salud Publico (DVG), a cuminsa contra di e website “E Arubiano”, manega dor di Farrah Boehoudt, pa motibo di publicacion di un articulo cu tabata infunda, negativo y difamatorio pa su cliente. Di tal indole cu ta a consecuencia di esaki el a haya un prohibicion pa drenta oficina di DVG y a cuminsa un investigacion.
Abogado Kock a bisa Hues cu ta e mesun Minister encarga cu Salubridad Publico a bisa den un conferencia di prensa cu a base di esaki el a tuma e decision pa cuminsa un investigacion y a prohibi entrada di e Director pa un investigacion imparcial por tuma luga.
Publicacion di e articulo no ta problema pa Staring, Abogado Kock bisa den su presentacion cu e problema ta e hecho cu e articulo, e forma con el a wordo presenta, ta mustra cu ta trata di informacion infunda y negativo pa Staring. Tur hende den prensa tin celular di e Director di DVG y facilmente por a tuma contacto directo cun’e.
Loke cu el a cuestiona na diferente ocasion den su pleidooi tabata cu dicon no a tuma contacto cu su cliente prome cu e publicacion. Permiti su cliente duna su banda di medaya, pa evita cu despues mester exigi rectificacion, cual nan no kier a cumpli cu e peticion tampoco pa cual mester a cuminsa e caso sumario pidiendo rectificacion. Niun hende, el a bisa, ta papia den e caso aki pa bay limita e libertad di expresion, pero publicando e articulo sin e version di su cliente ta haci cu e publicacion ta bira uno inhusto pa e Director di DVG.
E articulo aki ta publica basa riba informacion di empleadonan malcontento, cu entre otro cambio di e sistema organisatorio y promocionnan, cual ta cosnan cu su cliente, segun Kock, no ta responsabel pa bini cu nan of percura pa nan wordo otorga (promocion). Incluso, Departamento di Recurso Humano (DRH) a haci investigacion caba y no a bisa cu e cosnan (denuncianan of malcontentonan) ta berdad. Ora cu ta papia di caso di Zika cu a causa morto, ta solamente e demandante y un sra. M.Tromp ta papia di esaki. Niun otro hende mas sa di e caso(nan) aki.
Hues na final tabata kier sa pakico tabata asina importante pa pueblo haya e informacion publica, enbes di spera pa e resultado y haci un relato. Pasobra awor a haci e publicacion causando daño inmenso kisas na un hende innecesario. E Magistrado a menciona cu Aruba ta un pais chikito unda cu e impacto di social media ta mas grandi y hopi biaha ta publica cosnan innecesario, causando daño grandi na hende. Prensa, el a bisa, mester simplemente informa y no causa un hetze contra un persona.
Tambe e tabata kier sa di e demandante di ki forma e publicacion a afecta su persona. Staring a menciona cu e consecuencia principal ta cu a cuminsa cu un investigacion, a prohibie entrada y e hendenan ta pensa cu di berdad el a haci algo malo, siendo cu ta su trabou el a haci. Te cu prome cu e publicacion, su relacion cu e Minister di Salubridad Publico tabata normal.
E website di su banda, representa pa Abogado Benvinda de Sousa, a elabora di e libertad di expresion pa publica loke ta na interes di e publico (pueblo); cu e demandantenan kier a sigura cu ta bin un investigacion riba nan kehonan. E Abogado a sigura cu su cliente a trata di tuma contacto cu Staring, pero no a haya reaccion. Y tampoco di e Minister, sino te despues di e publicacion. Nan a bisa tambe cu no ta berdad cu e publicacion ta loke a causa e decision di Minister Dangui Oduber pa cuminsa un investigacion y prohibi entrada di Staring na DVG. Esaki pasobra tabatin denuncia cu a wordo haci directamente na e Minister via di e trahadonan y e sindicato TOPA cu ta representa e trahadonan.
Hues lo bay studia e caso y dia 20 di juli 2018 lo anuncia su veredicto.
