Pa mas o menos 12:30am, a anuncia e resultado final di Festival di Tumba 2020 cu a conta cu solamente 9 tumbero e aña aki. Awe a corona Jerrino “Bass” Ridderstap como Rey di Tumba, e di 49 edicion di festival di tumba riba nos isla, cu pa prome bes a organisa den Carnival & Entertainment Village na San Nicolas. Esaki ta di 4 biaha cu Jerrino “Bass” ta bay cas cu e corona di Rey di Tumba.
Como tumbero miho bisti a sali Jerrino Riddertap; Banda miho bisti a resulta Zeta Band; Cantante mas popular (mas ticket bendi) ta Rui Rupi di Delicious; Miho areglo a bay pa Jerrino Ridderstap di Delicious; Na di 3 luga a keda Gillian Wester cu su tumba “Hala faha mara”; Na di 2 luga a resulta Gerwin Hernadez; Mientras Rey di Tumba a resulta Jerrino Ridderstap cu su tumba “Ban lucha pe”.
Despues cu e resultado a bira conoci, Jerrino “Bass” Ridderstap a bisa riba escenario cu esaki ta prome biaha cu el a compone un tumba, anto sin ayudo di ningun otro compositor. Na un principio el a compone e tumba pa Edward van der Biezen, pero e ultimo aki a bira malo y su bos no tabata apto pa presenta y participa. Esey a haci cu Jerrino a dicidi pa e mes present’e. E tumba ta contene letranan dedica na e retonan cu e festival a pasa aden e aña aki. Cu e cancion e kier encurasha mas tumbero pa sigui lucha pa existencia y continuacion di e festival.
