Diahuebs tabata e dia cu a lansa e cancion nobo di conocido artistanan Tito el Bambino hunto cu Farruko composito pa Jeon. Ta trata di un cancion cu a keda compone pa Jeon y produci pa ‘Jhon Paul ‘El Increible’. E cancion a keda graba algun luna pasa na Miami y awor a keda comparti cu mundo completo. E titulo di e cancion ta ‘Se Va’. Ta trata di un cancion den e genero di reggaeton pero cu un ‘vibe’ hopi tropical.
Tito el Bambino no ta un desconoci den e mundo Urbano unda cu e la sa di cosecha hopi exito. E la tuma un break pa un temporada pero recientemente a hasi un introduccion bek den e mundo di Farandula. Naturalmente Farruko tambe ta un artista respeta cu un sin fin di exitonan.
Pa Jeon e tabata un placer di por a traha e cancion aki pa asina sigi hasi Aruba orguyoso di por tin un yui di tera cu ta produci pa artistanan di taya. Proximamente mundo lo sera conoci cu un otro tema internacional cu Jeon a compone. Tambe Jeon y su ekipo ta trahando riba e ultimo detayenan pa asina lansa su Album nobo.
Biniendo bek riba e exito nobo ‘Se Va’ interpreta pa Tito el Bambino y Farruko esaki ta disponibel riba youtube cu un tremendo videoclip. Tambe por cumpra of stream e cancion via Spotify, Apple Music, Deezer y Tidal.
Por mira e video clip: https://www.youtube.com/watch?v=jtkb1PjRd44
