Jonathan Thiel, conoci na Aruba como Biggy Boy y awo “Jeon” ta cla pa subi avion mayan y inicia un carera internacional cu na final ta priminti di ta hopi maraviyoso pe mes y pa Aruba completo. El a cera un acuerdo cu J-Balvin pa e cancion “Machika” cu expertonan internacional ta premira di lo bira un exito mundial. E lansamento oficial ta tuma luga diabierna awo, pero awe diaranson a tuma luga un ceremonia local, den cura di ex John F. Kennedy School.
Prome cu presenta e cantante, su tata Robert Thiel a dirigi su mes na e publico. A yama danki pa a sostene su yiu y den un forma masha emocional, cu awa na wowo, a desea su yiu homber tur clase di exito riba e caminda di bida aki y sperando cu e keda corda su raisnan, bon planta na Aruba.
Minister Dangui Oduber di Turismo ta convenci cu Jeon, conoci antes tambe pa su cancion “Hend’i Mondi”, lo logra den e carera internacional aki. E ta reconoce e talento di e hoben cantante, cu a cuminsa for di hoben den e industria y awor ta cla pa subi na e siguiente nivel. El a sigur’e cu Gobierno di Aruba lo para bandi dje pa sostene unda ta posibel.
Jonathan “Jeon” Thiel a conoce J Balvin na New York, den gym. Asina a start un amistad sin cu nunca el a bise cu e ta cantante di Aruba. Un dia el a presenta su cancion “Machika” na un DJ masha popular, cu a pone riba Instagram y eynan J Balvin a mire. El a mande un app bise cu e cancion ey ta “fuego” pa cual a reuni cu Jeon dia 30 di juli 2017 pa nan papia. Despues cu 1 luna largo e no a tende nada mas, el a pensa cu casi sigur nada ta bin afo.
Asina, drumi den boxershort na cas di su mama na Aruba na September aña pasa, el a ricibi un yamada di J Balvin, bise subi avion y wak pa mayan e ta na New York pa graba e cancion. Na December ultimo el a graba e video clip na Colombia. Awor ta asina leu cu e video-clip ta cla pa subi mercado, diabierna awo via internet y rednan social. Ta lansa e cancion precisamente riba e prome dia di e gira internacional di J Balvin, den cual Jeon tambe lo compañe.
Gira internacional
Mayan diahuebs caba, Jeon ta saliendo pa Los Angeles, California, pa ey topa cu J Balvin pa cuminsa un gira cune. E lo toca 20 minuut preshow den tur e conciertonan aki. El a conta nos cu e lo interpreta su cancionnan na papiamento y Machika e lo cant’e cu J Balvin durante e show.
Su prome concierto internacional ta tuma luga diabierna awo 19 y diasabra 20 di januari na Los Angeles, na Merca. E ta sigui dia 25 di januari na Paris, Francia. Su mayan, diabierna 26 di januari e lo presenta na Hulanda y despues 28 di januari Jeon lo ta hunto cu J Balvin na London, na Inglatera.
Tocante J Balvin
José Alvaro Osorio Balvin, mundialmente conoci como J Balvin, ta un cantante Colombiano di Reggaeton. E ta naci na Medellin, Colombia dia 7 di mei 1985, pues tin apenas 32 aña di edad. El a bira popular pa su cancionnan Mi Gente (Cu Daddy K), Sensualidad y Bonita.
Riba Instagram e tin no menos di 20 miyon siguido, riba Twitter e tin 5.4 miyon siguido, mientras cu e tin un otro 20 miyon “Likes” riba Facebook.
Tocante Jonathan “Jeon” Thiel
Jonathan Bryan Thiel a cuminsa su bida di cantante for di tempo e tabatin 8 aña di edad. El a participa den varios festival, tanto di carnaval, cultural y otronan, manera entre otro Festival di Himno y Bandera, Tumberito y mas. Su nomber artistico tabata “Biggy Boy” pero desde 6 aña pasa a cuminsa uza su nomber artistico “Jeon”, cu miras pa subi mercado internacional.