Sra Arends-Reyes den e prome luna di aña caba tin demasiado noticia negativo cu tin di hasi rond di e tema di seguridad riba nos isla. Tanto den e noticianan lamentabel di atraconan arma riba joyeria den pleno area turistico, den hotel luhoso, riba bishitante y entre otro tambe na cas di comerciante a bira headlines den e prome luna di aña..e ta un trend cu ta purba suavisa e resultado cu ta gara e mayoria di sospechoso pero hecho ta cu mester tackle tambe e motibo cu e personan aki ta cometiendo e actonan aki, un hende no ta nace criminal, kiko ta e circumstancianan cu ta pone nan yega asina leu?
E aspecto caminda e parti social y tambe di Enseñansa tanto formal como informal na cas ta hunga un rol. Costo di bida na Aruba ta hopi halto, tin mayor ta bisa trankil cu nan tin dos trabou of mas. Unda e tempo pa famia a keda, unda e muchanan y hobenan ta keda, ken ta supervisa nan?
Awor cu gobierno kier introduci pa 2020 35 miyon extra na BBO na entrada of ta cobr’e via invoerrechten ta logico cu aparte di e inflacion riba cuminda cu ta 18.2% caba, pronostico ta toch cu lo e aumenta mas cu tur e consecuencianan cu esaki lo trece cun’e pa Aruba. Cuminda na Aruba lo bira impagabel of lo mester cuminsa cumpra e producto mas barata, cu menos nutricion of sintetico pa por sobrevivi. Sra Arends-Reyes ta spera cu pueblo di Aruba informa nan mes tocante e decisionan cu gobierno kier tuma y su consecuencianan pa e consumidor. Gobierno tambe ta presupuesta 15 miyon na licensia pa cultivo di cannabis, ta ken nan lo cobra e suma aki y te ainda e ta un crimen pa cultiva cannabis kiermen nan ta contando di antemano cu coalicion den Parlamento lo aproba e decriminalisacion di cultivo di cannabis mas pronto posibel. Ki consecuencia esaki lo tin riba nos comunidad y hubentud? Te ainda ta preguntanan sin contesta. Bayendo back na e tema di seguridad, esaki tambe a laga hopi di desea na momento cu hospital a ser ataca cyberneticamente y te awe tin tardansa cu patientnan pa motibo di e caso aki. Otro caso sumamente lamentabel tawata locual cu a pasa na un scol basico na Santa Cruz cu te awe no tin bista di kendenan por a comete un destruccion asina. Mester remarca cu ya ta pa un periodo largo gruponan di maestronan ta pidi atencion pa seguridad na scolnan y ta parce cu ta te ora algo pasa lo actua. Den e caso di Cacique Macuarima school locual por siña di e caso aki ta cu Aruba su comunidad a uni pa duna nan aporte pa purba restaura locual a daña, cual por cierto ta noble pero e prome yama ta gobierno pa a duna un man y pone fondo pa restaura y bin cu un plan pa preveni actonan similar. Den mi concepto mester tuma e caso na serio pa locual ta trata prevencion na scolnan, sea ta pone alarma hunto cu camera of algo pero pa e situacion keda mescos si lo ta pika. Cuerpo policial tey pa ora algo pasa nan no ta security guards y nan no por hasi mucho pa keda cuida un edificio, dus bisando esey, ta keda na e subsidiario principal di nos scolnan pa actua. Cada scol riba su mes huntu cu nan fundacion mester yega na palabracionan y metanan concreto pa implementa, mirando cu mundo cada biaha ta bira mas moderno y cada biaha mester adapta nan maneho. Por ehempel kiko scolnan mester hasi ora tin menasa di tiroteo? A prepara y duna training na e maestronan y alumnonan kiko pa hasi? Seguridad ta primordialmente un sentimento ageno no por tira culpa riba un noticiero cu a publica un informacion real cu a leak y despues gobierno y scol ta bisa mayornan pa calma nan mes y no worry. Ta jiu di hende y bida di personanan inocente ta trata aki, no por core e risico cada biaha cu no ta papia tocante sucesonan, mester percura pa trata e casonan di serca pa bai wak di unda e menasanan a origina y su motibo. No por sigui tuma tur cos na Aruba cu un ‘korreltje zout’ y bida ta sigui manera nada no a pasa, di berdad mester tuma tur caso na serio, e actornan concerni y gobierno en especial mester tuma nan responsabilidad, e parti di prevencion, seguridad y training na serio pa asina Aruba y su comunidad ta mihor prepara pa tur eventualidad sea ta calamidad natural, bio- medico, pandemia, casonan social cu consecuencia pa comunidad y of menasanan sra Arends-Reyes ta termina bisando.
