Jennifer Arends-Reyes ta mustra cu despues di algun dia intensivo di tratamento di presupuesto 2018, esaki ta tras di lomba den algun reunion cu a resalta diferente interupcion di parti di publico den tribuna cu na algun ocasion tabata ofensivo y menasante.
‘Di parti di AVP nos a cumpli cabalmente cu nos responsabilidad y den e tiki dianan cu a haya pa prepara nos mes pa tratamento di e presupuesto, nos a logra di dirigi un total di 997 pregunta riba e presupuesto aki.
Fraccion di AVP a traha base di un coordinacion caminda cada Parlamentario tabatin su propio tema principal cu nan kier a trece dilanti mientras cu miembronan di fraccion di MEP practicamente tur a trece dilanti mesun cos y nan no tabatin temanan specifico.
Un cantidad bastante grandi mocion a wordo presenta durante di e reunion aki compara cu añanan anterior caminda kisas e cantidad di mas halto cu a yega di presenta, tabata te cu 60 mocion pero den e reunionnan di presupuesto 2018, a presenta un total di 86 mocion pa parlamento atende.
Den esakinan nos por a tuma nota di cantidad di deseonan cu miembronan di fraccionnan cu ta sostene gobierno a trece dilanti, varios di nan tabata un ripiticion riba mesun tema pero tambe mocionnan cu tabata bastante discriminatorio den nan contenido loke a rekeri hopi estudio pa mira kico ta intencion tras di esakinan, ya cu na momento c’un mocion wordo gana sosten di Parlamento, esakinan por wordo implementa tambe.
Mi persona a presenta un mocion cu sigur ta biba hopi den comunidad den ultimo lunanan, principalmente den e sector di enseñansa, cu apesar cu algun parlamentario cu ta sostene gobierno a mustra cu lo ta un grupo limita, pero e grupo di maestronan di DPS so ta conta mas cu 1000 maestro kendenan pa gran parti ta sinti hopi insiguridad riba e intencion di gobierno pa independisa enseñansa aki na Aruba.
Pa algun luna caba tabatin diferente actividad riba e topico aki den comunidad, caminda nos fraccion a reuni cu varios grupo di maestronan y hasta tabatin accion di firma pa mustra nan inkietud pa cu e intencion di gobierno pa independisa DPS.
Un desaroyo cu a bin ta afectando hopi maestro pa motibo di stress cu nan ta sinti relaciona cu e incertidumbre pa cu e pensamento y intencion di gobierno pa cu futuro di DPS.
Relaciona cu esaki tambe mi persona na nomber di nos fraccion a formula un mocion nr 33 cu a wordo aproba, riba e punto aki y cu ta bisa lo siguiente:
‘Considerando cu minister di enseñansa a anuncia e intencion pa independisa scolnan publico na Aruba, den e plan di minister esaki lo nifica cu scolnan publico lo cay bou di un fundacion nobo, y no mas bou responsabilidad directo di gobierno, c.q minister di enseñansa.
E cambio proponi dor di minister lo tin consecuencia pa entre otro e posicion huridico di e personal educativo y tambe e personal di sosten di scolnan, pa e maneho y tambe un punto importante, e financiamento di scolnan publico.
E consecuencianan aki ta causa sigur di intrankilidad y insiguridad grandi bou personal educativo y di sosten di scolnan publico. E intrankilidad y insiguridad aki no a wordo kita dor di e splicacion di e minister y su conseheronan.
Enseñansa na Aruba in mester di mas atencion pa mehoracion continuo di calidad di nos enseñansa y no di cambionan innecesario asina, cu a crea intrankilidad y insiguridad bou maestronan y personal di sosten den scolnan.
Personal di scolnan publico y sindicato cu ta representa e personal aki, sigur a expresa nan rechaso rotundo pa plan di independisacion di scolnan publico den reunionnan tanto cu minister, cu reunionnan cu miembronan di parlamento, den prensa, radio y corantnan, y sigur tambe riba social media.
Tambe e miembronan di parlamento di diferente fraccion a expresa publicamente, e desaprobacion di e intencion di independisacion di scolnan publico.
Esaki ta nifica cu no tin suficiente sosten pa e intencionnan di minister ni den enseñansa ni den parlamento.
Pesey e dictum ta bisa: Ta urgi minister di enseñansa pa cancela den forma definitivo e plan pa independisa scolnan publico y pa informa scolnan publico y personal di scolnan publico di e decision pa cancela den forma definitivo e plan di independisacion di scolnan publico. E cancelacion definitivo di e plan aki ta inclui tambe pa independisa colegio EPI.’
Ta un mocion cu a wordo aproba pa Parlamento loke ta mustra cu no tin sosten di Parlamento pa independisa scolnan publico y si minister riba su mes kier continua cu e proceso aki sin bin parlamento, sigur mi ta kere ta e rumbo incorecto cu e minister kier sigui tuma,” Parlamentario Jennifer Arends Reyes a mustra.
