Jeffrey Schuilenburg: No ta compronde con investigacion corupcion ta tarda hopi

Aña pasa, dia 10 di juni, a tene un manifestacion dilanti di Ministerio Publico cerca e procurador general adhunto Van Dam. Segun Jeffrey Schuilenburg, hunto cu Tony Sneek di e Movimento Accion Nacional di pueblo Arubano, a sigui splica cu e tempo ey a manda vocero di OM Ann Angela, primintiendo cu investigacionnan di tur indole tabata andando, manera e procedura ta demanda.

Ta compronde cu casonan di corupcion administrativo no ta cosnan manera cu ta horta un kipashi den supermercado. Pero esaki ta cosnan cu en berdad ta tuma su tempo.

E tempo ey, segun Schuilenburg, Angela a bisa cu nan ta bezig cu e casonan, pero nan mester di cooperacion di Ministerionan Publico di otro paisnan pa sigui e movecion di placa unda e ta bay. Ta cosnan cu ta di compronde.

Loke ta bira un tiki incomprendibel ta, cu nos ta den un reino caminda cu tur ley ta mesun cos. Ta cay bao di ley Hulandes. Loke ta straño ta cu na Corsou y St. Maarten ta haya cu politiconan cu a corumpi of cu a malversa placa y fondonan publico, nan si a haya cooperacion di diferente pais y nan por a sigui e movecion di placa. Por a mira politiconan bay cera, te cu nan a sali liber. Ta casonan cu a bin despues di casonan cu a tuma luga of casonan entrega aki na Aruba.

Schuilenburg ta cuestiona dicon ta tarda asina hopi. Por a scucha cu tabata tin varios inval, pero no ta mira resultado.

Si e problema ta cu no tin cooperacion for di OM di otro paisnan, e ora e pregunta ta dicon Corsou, St. Maarten, Hulanda si ta haya cooperacion mientras cu Aruba no.

Aruba ta un di esnan cu mas a yuda internacionalmente pa combatimento di labamento di placa y otro actividadnan criminal. A perde un Free Zone, danki na coopera cu otro paisnan riba labamento di placa.

A impone un MOT na Aruba pa asina por coopera cu labamento di placa internacionalmente. Kico ta pasando cu Aruba no por haya cooperacion cu otro paisnan? Of ta e boluntad no tey?

Awo kier haci un otro manifestacion. Segun Jeffrey Schuilenburg, diaranson a lesa cu tabata tin seis caso di inval y e ta contento pasobra ki ora cu nan papia, ta haci algo. Pero e resultadonan, con a para cu nan.

P’esey awor aki a haya un procurador general manera cu a pidi’e dia 10 di juni den e manifiesto, unda cu nan a puntra si ta necesario un procurador pa Aruba, di cual a haya uno. Kico a sosode cu e procurador aki? Dia 1 di september a instal’e na Aruba y tin como cinco luna sinta eynan. Kico ta e logronan? Kico a haci? Unico cos cu e procurador general a haci, ta cu el a demanda gobierno pa un toque de queda y a perde su caso, cual ta un tremendo introduccion na Aruba.

Ta spera cu den un siguiente manifestacion por sinta cu ne, pa por sa kico ta pasando. Di experiencia, pueblo di Aruba sa caba con e cos aki ta bay, ora di ta trata di fraude y corupcionnan administrativo. Ta rek e caso asina hopi y ora cu gobierno cambia di signatura, ta bari tur e investigacionnan ey pa despues e otro gobierno sinta.

Ora cu e otro gobierno sinta, e ta bay demanda e gobierno cu a sinta prome. Despues ta keda rek’e te ora cu nan cambia, bolbe bari tur cos fo’i mesa atrobe.

Schuilenburg a indica cu e ta kere cu e siguiente manifestacion por bira un poco mas tempran, mirando cu no tin carnaval e temporada aki, cual fecha ta anuncia despues.

No por duna nan kier

No por laga e hendenan aki get away cu tur e placa horta. Tin indicacion duidelijk cu a horta placa. Awor aki loke ta mirando ta un wega politico cu ta wordo hunga. Esaki ta un paso mas cu ta dal na Ministerio Publico na Aruba, segun Tony Sneek.

A haya un carta caminda cu ta bisa cu tin cu acerca hof di Corsou pa duna un keho. Tin di bay Hoge Raad na Hulanda, cu ta corte mas halto cu tin den Reino Hulandes. E intencion ta pa si despues cu si Hulanda no paga tino loke ta haci, ta dispuesto pa bay Union Europeo y Nacionnan Uni, pasobra no por sali liber di loke a horta.

Tin indicacion cu ta trata aki di e mesun wega cu a yega di wordo hunga caba, caminda cu e intencion ta pa laga e caso verjaar y e politico por get away cu murder. Por a mira un politico den prensa ta sali den boxer, cu ta un falta di respet total, mirando cu ta un ex minister. El a sali acusa papa cu mama sin ningun prueba.

Sin embargo tin prueba riba e persona aki pa demostra cu el a haci corupcion. Den e caso cu nan ta investiga, cual ta asunto di Tereno Gate, ta un caso. E mesun minister aki tin Watty Vos Boulevard Gate, cual ta 825 miyon florin di placa di pueblo y tin Vierbaans Weg, cu ta e mesun minister tambe, cual ta 750 miyon, cu no a wordo investiga. No ta hayando ningun informacion di Ministerio Publico, segun Tony Sneek.