Campeonato HEINEKEN fast pitch di Aruba Softball Bond dedica na dos baluarte Jacobo Jansen y Gilbert “Nando” Maduro a continua riba veld di Dragon Hitters cu un tremendo ambiente y un bar y cushina bon surti.
Den categoria AA e fuerte equipo di Jay’s Tire no tabata tin un anochi facil y mester a traha duro contra Celebrities campeon di A-Klas 2018 kendenan a subi AA e aña aki y ta dunando tur equipo un bon bataya y dolor di cabez. Celebrities ta pika ariba 1-0 den cabez di promer inning pero Jay’s Tire ta reaciona y bolter e score mesora 3-1.
Celebrities ta rally pa 7 careda den di dos inning y ta bay ariba 8-4. Den bom di 3 inning Jay’s Tire kedando den bataya ta anota 3 careda pa hasi e wega 8-7. Den bom di 4 Jay’s Tire ta anota 4 careda mas pa bolter e score na nan fabor 11-8. Celebrities no ta entrega y ta rally pa 2 careda den cabez di 5 pa hasi e score 11-10 pero ta keda cortico na un careda. Boxscore final Jay’s Tire 11 careda, 8 hit, 3 error y ta laga 9 coredor na base.
Celebrities 10 careda, 10 hit, 1 error y ta laga 9 coredor den circulacion. Jay’s Tire a bay como equipo di 18-8 pa un averahe di 444 mientras Celebrities a bay di 26-10 pa un averahe di 384. Mihor bateadornan pa Jay’s Tire ta Nathan Berkel 2-1 incluyendo un cuadrangular mas 4 rbi, Sando Geerman 3-2 cu un careda anota y 1 rbi, Jerwin Peña di 3-3 incluyendo un doblete mas 2 careda anota y 2 rbi, Jowald de Cuba 1-1, Artoir Herrera di 3-1 cu un triple.
Pa Celebrities a destaca na plato Jonathan Ruiz y Ruwin Tromp di 3-1, Ozzi Webb y Gregory Manuel Jr di 2-1, Wensley Kock di 1-1 mientras Joshua Wever ta keda “hot” y ta bay di 3-2 cu 2 doblete mas 4 careda impuha. Gianmar Alders ta habri pa Jay’s Tire y ta bay 1 inning y 1 tercio tirando 20 bola, 23 strike pa un total di 43 pitch permitiendo 7 careda tras di 6 imparable. Jorge Santana Cortina ta drenta di relevo y ta enfrenta 20 bateador tirando 82 lansamento permitiendo 3 careda di cual 1 ta limpi tras di 4 hit y ta regala 2 base por bola pa pone e victoria riba su nomber.
Rudolf “Rudy” Angela ta bay complete enfrentado 32 bateador tirando 60 bola, 53 strike pa un total di 113 pitch permitiendo 11 careda di cual 9 ta limpi tras di 8 hit regalando 8 base por bola pa pone un otro derota riba su nomber. Weganan ta continua dialuna, diaranson, diabierna na Pos Chiquito y diamars y diahuebs na Dragon Hitters. Dragon Hitters conosi pa su pastechinan sabroso y un bar bon gestock. Tin 10 wega programa pa e siman entrante di 17 pa 21 di Juni. Softball competitivo a la carga!!
