Jay’s Tire ta derota Spuiters MIPA 9-6

Campeonato HEINEKEN fast pitch di Aruba Softball Bond dedica na dos baluarte Jacobo Jansen y Gilbert “Nando” Maduro a continua riba veld di Dragon Hitters. Den categoria AA e equipo sub campeon den AA 2018 esta Jay’s Tire a faha duro contra Spuiters MIPA e aña aki maneha pa Poy Flanegin y ta saca un victoria importante cu score di 9-6.

Como equipo Jay’s Tire a bati di 28-15 pa un averahe di 536. Spuiters MIPA como equipo a bay di 23-4 pa un averahe di 174. Resumen final Jay’s Tire 9 careda, 15 hit, 2 error y ta laga 7 coredor na base. Spuiters MIPA 6 careda, 4 hit, 0 error y ta laga 7 coredor den circulacion. Mihor bateadornan pa Jay’s Tire ta Jason Orman y Jeromin Kelly di 3-2, Sando Geerman di 3-2 cu 2 rbi, Jerwin Peña 4-2, Artoir Clifford Herrera 2-2 cu 2 careda anota y 1 rbi, Giancarlo Gomez di 3-2 cu 1 careda anota, 5 rbi y un cuadrangular den parke.

Pa Spuiters a destaca na plato Gerald Tromp 4-2, Joel Flanegin 4-2 cu 1 careda anota y 1 rbi. E hoben Gerald Maduro jui di e temible bateador di antes Aldrin Maduro ta habri su promer wega official pa Jay’s Tire den AA y por mira atras riba un tremendo actuacion lansando 4 inning 41 bola, 47 strike pa un total di 88 lansamento permitiendo 4 careda propinando 4 strike out y ta regala 6 base por bola lagando e wega 4-4 cual sigur ta un tremendo performance den su promer actuacion. Gerald Maduro ta wordo releva pa Jorge Santana Cortinas kende ta seya e victoria riba su nomber lansando 2 inning, 43 pitch, permitiendo 2 careda riba 1 hit regalando 1 base por bola.

Johannes Poy Flanegin ta bay henter e ruta pa Spuiters tirando 5 inning, 32 bola, 68 strike bon pa 100 pitch permitiendo 9 careda riba 15 imparable propinando 4 strike out regalando 3 base por bola. weganan di fast pitch ta continua tur dialuna, diaranson, diabierna riba veldnan na Pos Chiquito mientras tur diamars y diahuebs na veldnan na Dragon Hitters. Na Dragon Hitters bar y cushina ta top top cu pastechi y refresco sabroso. Fanaticada jega tereno bin apoya bo equipo prefer!!