Awe tardi Cuerpo Policial Aruba a confirma cu e sospechoso Jason Mathilda keto bay ta cera. E sospechoso ta encarcela na ward’i polis di Noord, situa na Shaba. Ta acus’e di ladronicia, pa cual e mester duna cuenta y rason na recherchenan cu tin e caso. Mañan fiscal lo mester tuma un decision si ta prolonga su detencion cu ocho dia mas of si ta lag’e den libertad condicional pendiente e investigacion andando.
Hopi hende a imagina cu, debi na e persecucion di oranan largo su tras y e forma con el a burla di autoridadnan, cu lo a impone mas acusacion contra dje. Pero parce cu e recherchenan encarga cu e investigacion a pone solamente “diefstal”, cu lo haci cu mucho dia no por want’e den prizon, pio pasobra e delito na final lo por bira “joyriding” pasobra e no a purba sconde e vehiculo of bend’e cu otro hende, etc.
Jason Mathilda, aunke hoben, solamente 30 aña di edad, ya a cana un trayecto penal lago den su bida. A bay cera na mas di un ocasion y como tal ta consider’e un conocido di husticia y hasta di ta un figura peligroso. Den termino policial ta referi na dje como “vuurwapen gevaarlijk” pasobra su ultimo acto criminal tabata posecion di un arma di candela.
Fiscal lo laga sa mañan atardi ainda cu si e tin cu sigui den detencion preventivo na ward’i polis of si e por bay cas numa pendiente mas investigacion. Den un caso asina ta tuma su declaracion, esun di e doño di e mashin acuatico, check si e por a comete daño na e vehiculo y cera e caso pendiente pa e bay dilanti mesa berde. Tin hasta chens cu fiscal por opta pa dun’e un “taakstraf” pa e hazaña cu el a comete dialuna atardi te den oranan di anochi.
