Jason Margarita lo pasa weekend den cel

Awe den oranan di mainta e fotografo Jason Margarita mester a presenta dilanti hues comisario. 

Esaki ta un procedura normal pa tur persona deteni. Hues comisario ta e funcionario cu ta evalua e detencion di un detenido. Si autoridadnan a cumpli cu tur e rekisitonan, si no a viola su derechonan y si e sospechonan cu tin contra dje tabatin suficiente base pa bay over na su detencion.

Segun por a compronde, e prome fase aki a bay bon pa cual hues comisario no a ordena su libertad. El a keda cera na warda di polis.

Na momento cu detene un persona, e ta bay riba ordo di fiscal. Ministerio Publico mester percura cu prome cu 3 dia y 15 ora pasa, e persona aki ta bay dilanti hues comisario pa evalua su detencion. Awor cu tur cos a bay na ordo den su detencion, prome cu 10 dia pasa mester bini un otro decision si ta want’e deteni of no. For di e momento ey te ora cu e caso yega dilanti mesa berde, hues comisario ta esuncu ta dicidi riba prolongacion of no. 

Denuncia

Tabata diahuebs mainta trempan cu recherchenan di Jeugd- en Zeden Politie a detene Jason Margarita, naci na Corsou y di 39 aña di edad, sospecha di ta tene relacion sexual cu mucha. Despues di oranan di interogacion, fiscal a ordena su encarcelacion pendiente e investigacion. 

Margarita ta consehero di partido POR, di ex-minister Otmar Oduber, di DIMAS, di radioemisora POWER FM y ta doño di e gym Perfect Me, cu ta riba nomber di su pareha. Ta eynan mes el a conoce un menor di edad cual el a cuminsa basila pa logra su proposito cu a bira un acusacion sexual, te ora cu e mayornan a haya sa y a haci un denuncia.

Aparentemente pa placa entre otro el a logra convence e menor pa comete actonan inmoral. E mayornan di e menor a descubri e telefon di nan yiu ora cu a cuminsa sospecha cosnan straño. Aunke a purba deshaci di evidencianan, tog esaki no a logra full. Cu e pruebanan aki a logra hiba un keho na Jeugd en Zeden Politie cu a duna atencion na e caso aki tambe.

Asina a pasa e proceso di investigacion y tambe interogacion. Cu e informacion, pruebanan y evidencianan acumula a logra pone tur cos nechi riba papel. Cu tur cos bon documenta a sigui pa Ministerio Publico. Eynan fiscalnan a analisa tur cos y a dicidi cu ta duna autorisacion pa bay over na detencion. Esey ta loke a sosode y asina autoridad a pone man riba Jason Margarita.