Jason Brown a conta cu sosten di mayoria den directiva di Stichting Maneho Aruba su Carnaval (SMAC), e organisacion encarga pa organisa carnaval 66 riba nos isla. E fundacion ta existi pa 5 aña caba y a apunta su di tres Presidente awe nochi durante un reunion di Directiva na nan sede.
E tres candidatonan tabata Zuleika Wever, Darren van Ommeren y Jason Brown, kende a conta cu sosten di MUSICA y otronan den e directiva. E lo encabesa e organisacion den cuadro di organisacion di Carnaval pa aña 2020.
Di acuerdo cu eleccion di e puestonan den SMAC awenochi, a eligi Jason Brown como Presidente, Darren van Ommeren como Vice Presidente, Zuleika Wever como Secretario, Betzabeth Rasmijn como di dos Secretario, Kiala Kock como Tesorero y Indira Tromp como di dos Tesorero.
E particion di miembronan den directiva di SMAC ta encera 4 miembronan procedente di Gruponan Uni, pues di e gruponan cu ta participa activamente den paradanan di carnaval. Tin 4 miembro di Fundacion MUSICA y tambe 3 miembro independiente entre e 8 miembronan cu ta bini entre e dos organisacionnan di gruponan y bandanan di carnaval.
Pa awor, SMAC ta para na un crusada importante den nan existencia. Nan tin 5 aña caba encarga cu organisacion di carnaval riba nos isla y a haci diferente cambio caba den e forma di organisa, e premionan, e fechanan, ruta y hopi mas. Tin di e cambionan a bay facil y otronan a conta cu resistencia. E prome Presidente di SMAC tabata Randy Thiel y di dos tabata Shannon Henriquez.
