Den e ultimo dianan tin varios desaroyo pa loke ta e area di horeca. Jan van Nes di Aruba Food & Beverage Association, a reuni varios biaha cu ATA y demas gremio, como tambe den nan mesun seno, pa mira kico ta e miho forma di por yega na loke a yama un total shutdown, ya cu nos fronteranan a wordo cera.
A opta pa un self regulating shutdown. E parti di Horeca, tin por lo menos 5 mil empleado y si tin hopi di nan riba caya, por trece caos. Den e proceso aki tin varios restaurant. Entre nan por menciona Casa Tua, Bohemian, Casa Tua Gianni’s Group lo cera, varios grupo ta en espera di nan doño of accionista.
Pa e fin di siman lo wak cu mas y mas restaurant lo cera. Ta den espera tambe di yega na cierto areglo cu nan personal, banco y otro factornan cu automaticamente lo bin dilanti.
Area di hotel
Un dia pa otro e personal lo por ta riba caya. Si bira un shutdown den e proximo dos simannan, nos lo por sigui den e crisis mode. Ta spera cu e crisis mode aki lo ta mas cortico posibel. Mester tin na pensamento cu e lo por dura mas largo y por bay mira kico por haci, kico ta loke pais Aruba lo haci pa e dolor ta menos.
Van Nes ta pensa por ehempel di un suspension di cuentanan di awa, coriente, cu ta e prome necesidad y tambe telefon, acuerdonan di huur cu ta wordo posponi pa e momento, pa alivia. Lastimamente si, nos mester por prepara pa a lo menos 3 luna.
Acuerdo
E idea ta cu ohala por start up bek lo mas pronto posibel. Ta bay tin mester di e staff. No ta tur doño di restaurant por haci e compromiso pa manda hende riba un vakantie colectivo cu salario paga, of bin toch cu un tipo di plan di emergencia.
Palabranan final
“Esaki ta algo cu nos nunca no a experencia den tur su 45 aña di experiencia”, segun van Nes. Ta un golpi cu nos nunca no a experencia. “Nos lo ta mas inventivo y creativamente posibel pa wak con por bay door di e crisis aki. Tambe percurando pa salud di coleganan, di e asociadonan, di e huespednan cu por lo tanto no lo bay tin. Pero e ta bay ta un periodo hopi challenging. Eynan mester sostene otro den lo maximo.”